Aruba desde inicio di su historia a conoce migracion di cada skina di mundo, cu a resulta den nos idioma Papiamento, nos cultura y nos Identidad. Nos idioma a wordo forma pa diferente otro idioma, manera Spaño, Portugues, Ingles, Hulandes, Frances, idiomanan di Africa y mas.
Den añanan ’40, ora cu LAGO a keda construi, den corto tempo migracion tabata significante pa exito y funcionamento optimal y responsabel di e refineria. Un parti di San Nicolas a adapta Ingles como nan lenga di comunicacion, apesar di nan cultura y propio lenga materno. Esaki debi cu e idioma aki tabata wordo usa pa LAGO, cu tabata un compania Mericano. Nos idioma Papiamento asina ta haya e influencia di palabranan Ingles desde e tempo ey.
Nos lider di partido Movimiento Electoral di Pueblo, Sr. Betico Croes (d.f.m.) a logra nos Status Aparte na 1986, despues cu Aruba a forma parti di Antiyas Hulandes. Esaki a duna Aruba un posicion autonomo den Reino Hulandes. Esaki ta duna Aruba e derecho di tuma su propio decicionnan y su mesun destino den e mundo di pueblonan liber y soberano.
Aruba como un pais multicultural a introduci nos Papiamento como e idioma oficial, banda di Hulandes, cu ta e idioma oficial di Reino Hulandes.
Aruba conoce mas di 90 nacionalidad cu ta bibando den harmonia cu otro, na unda cu cada nacionalidad a forma y ta parti fundamental di nos idioma Papiamento.
Di dos migracion masal
Despues di Status Aparte na 1986, Aruba a atrae cadenanan hotelero prestigioso cu a causa presion riba e mercado laboral local, na unda cu a conoce otro fluho grandi di migrante, mayoria di paisnan Latino, Caribense y di otro paisnan. Aruba a conoce un otro era di prosperidad den añanan ’90! Sinembargo cu e importacion masivo a bin problemanan social. E problemanan aki ta cu e gobierno mester expande e infrastructura existente cu mas cas, mas caretera y den corto tempo Aruba a bira un pais sobrepopula y sobrecarga. Door di gran importacion di trahadornan for di exterior, esaki a causa tambe problemanan social. Importacion acelera a trece cune escases cu no ta tur grupo di trahador importa a adapta nan mes den e comunidad y a influencia cultura, custumber y nos idioma Papiamento. Pues historia a ripiti su mes, prome tabata e era di Lago y awor ta den e sector di Turismo.
Integracion ta sumamente importante.
Un di e condicionnan ta cu cada migrante mester tin capacidad di por compronde, skirbi y papia Papiamento. Esaki ta importante pa por asina naturalisa y integra.
Aruba su cultura ta un fusion di diferente cultura hunto, pues Aruba ta un pais multicultural y ta spera cu tur migrante acepta Papiamento como e idioma oficial, nos cultura y adapta na esaki y honra su di dos pais cu a adopt’e como su propio yiu. Hunto nos ta logra hiba Aruba su economia dilanti y sali di e crisis actual mas fuerte y un pais mas inclusivo pa nos proximo generacionnan.