Dia 9 di Maart 2021 a tuma lugar e competencia Poeta di Patria 2021. Un anochi masha bunita cu a tuma lugar den Cas di Cultura. En totaal a participa 14 persona cu nan poema propio. Un anochi cu a bira un berdadero caricia pa e oreanan.
Banda cu nan ta aporta na nos bahul literario di nos dushi Papiamento, nan ta aporta grandemente, mescos cu e Festival di canto, na e celebracion grandi cu e aña aki ta tumando lugar. Dia 1 di januari 2021 nos a cumpli 35 aña cu Aruba a haya su Status Aparte y dia 18 di maart venidero nos ta celebrando 45 aña di nos Himno y Bandera. Ambos ta fechanan sumamente importante pa nos pais. Pesey mes mi kier duna elogio, felicita y yama danki na tur participante cu a participa na e competencia aki. Un bunita anochi yena di frasenan bunita acccentuando e amor pa nos isla, orguyo di ta un Arubiano, historia y tradicion, custumbernan, preocupacion y mucho mas. Danki pa comparti boso pensamento, sentimento y mas cu tur cos boso amor pa nos dushi Aruba.
Un pabien di curason na tur e gandornan. E ganador absoluto a bira señor Frank Croes cu su poema ‘Nos lenga’, na di dos lugar a keda John Freddy Montoya cu su poema ‘Mas di mil motibo’ y na di tres lugar a keda Sergio Winterdal cu su poema ‘Mi Sanger’.
Por ultimo mi kier a felicita e Comite organisado y gradicinan pa e invitacion y sigur tabata un placer di por a otorga premio na Jhon Freddy Tobón Montoya.
Na caminda pa e celebracion grandi di 45 aña di nos Himno y Bandera, laga nos tur saca e sentimentonan patriotico, cu nos ta sinti ora nos mira nos bandera ta bula y scucha nos Himno resona, cu ta asina necesario pa saca nos pais padilanti.