Den aña 2020 a yuda cu 23,8 miyon florin
ORANJSTAD – Pa surpasa e crisis di COVID19, Gobierno di Aruba ta ofrece yudansa financiero den forma di Sosten Financiero di 4000 florin pa kwartaal na empresanan chikito y mediano cu tin 1 te cu 50 trahador. E meta di e Sosten Financiero ta pa yuda e empresanan cu ta mas afecta pa e crisis di COVID19 cu un fondo cu cual nan por cubri gastonan di operacion di e negoshi. Den e promer kwartaal di aña 2021 Gobierno a yuda 1348 empresa chikito y mediano cu 5,4 miyon florin.
Den aña 2020 Gobierno a yuda cu 23,8 miyon florin
E yudansa di 4000 florin pa kwartaal ta wordo duna desde aña 2020 caba. Na mei 2522 empresa a wordo yuda pa un suma di 10,1 miyon florin. Na juli a yuda 1607 empresa cu 6,4 miyon florin y na oktober a yuda 1822 empresa na balor di 7,3 miyon florin. Pues un suma total di 23,8 miyon a wordo duna pa Gobierno den aña 2020 pa asina yuda empresa chikito y mediano surpasa e pandemia.
A baha gasto y salario pa ta solidario
E yudansa financiero aki por a wordo duna danki na tur e gastonan cu a logra baha den Presupuesto di Pais Aruba pa 2020 y 2021. Banda di esaki tur hende cu a mustra solidaridad den rebaho di nan salario, specialmente e empleado publico y e trahadornan di NV di Gobierno, a haci e yudansa aki na empresa chikito y mediano posibel.
