Riba 18 di maart venidero nos ta celebra dia di Himno y Bandera y mi ta haci un yamada na tur conciudadano irespecto origen of nacionalidad pa hisa nos bandera di Aruba y aprecia locual Aruba ta nifica pa nos tur. Nos meta mester ta pa hobennan haya oportunidad pa participa gratis riba un escala grandi na actividadnan cultural, pa asina desaroya nan habilidad y talento riba tereno di arte y cultura. Y pa asina logra un pueblo feliz cu tin un satisfaccion grandi di sa kico ta nos Identidad, nos idioma, nos cultura y nos historia.
Introduccion di dianan di districto, a base di un estudio pa fiha e fecha conmemorativo pa cada districto y lo wordo celebra cu actividadnan recreativo popular y cu manifestacion cultural. Institui un Comision Nacional cu amplio representacion pa publica e historia di pais Aruba, specialmente e lucha pa incorpora den curiculo na nos scolnan. Planea y ehecuta mas investigaicon riba tereno di cultura pa por mehora e calidad y e producto cultural.
Historia y cultura ta un yabi pa desaroyo sostenibel di un pais. Movimiento Electoral di Pueblo (MEP) lo sigui implementa nos Plan Nacional di Cultura. Sondea e posibilidad di atraccion cu cada bario di Aruba tin di ofrece como producto turistico pa asina educa y informa nos bishitantenan di e producto y Identidad di Aruba mas holistico manera a cuminsa cu Island Festival na San Nicolas y lo a trece esaki den tur districto di nos Isla. Apoya y stimula productonan y actividadnan autentico local y cultural, manera pica di papaya, artesania, grupo di baile folklorico, festivalnan, parke nacional Arikok etc. Activa centro di Barionan pa brinda recreacion sano pa chikito y grandi cu programa di beca deportivo y cultural den bario manera a bin ta haci cu Bario Fest den diferente districto. Construi canchanan multifuncional den diferente bario cu actividad despues di scol manera a bin ta haci na IBISA San Nicolas.
Nos prioridad mester ta pa promove integracion y un maneho migratorio mas humano pero alabes mas controla y sigur mas eficiente. Te ainda tin hopi fayo den nos administracion cu ta keda pega entre otro na LAR (Landsverordening administratieve rechtspraak). Nos mester sigui profundisa nos mes den e areanan cu mester mehoracion pa nos por sigui fortifica nos Democracia. MEP ta kere den un crecemento economico Inclusivo y responsabel, na unda por percura pa garantisa cada conciudadano cu ta biba den nos pais un calidad di bida halto. Nos prioridad ta pa haci Aruba un lugar mas sigur, mas husto pa nos yiunan y nan yiunan por biba trankil y liber. Proceso pa aplica pa permiso di pasaporte mester bira mas transparente, den cual sosten lo wordo brinda door di e ‘centro di apoyo’ na e Departamento di Integracion (pues no esun encarga cu admision). Aruba Certification Program tambe tin su balor agrega tanto pa local como migrante mester por wak con pa tin un sinergia den esaki pa por tin un pueblo cu ta “canta mesun cantica” den cuadro di nos historia.
Partido Movimiento Electoral di Pueblo ta invita bo pa hunto nos traha pa crea un miho futuro pa nos yiunan y nan yiunan. Hunto nos lo haci e diferencia pa un miho ARUBA.