Oranjestad – Comision Celebracion Dianan Nacional (CCDN) bou auspicio di Ministerio di Cultura ta sigui trece dilanti informacion di nos simbolonan nacional y e biaha aki ta toca nos himno nacional titula ‘Aruba dushi tera’ den su celebracion e aña aki di 45 aniversario.
Nos Himno:
‘Aruba Dushi Tera’ ta titulo di e himno nacional di Aruba. E historia di e cantica cu a bira nos himno nacional ta data di 1951. Dos musico hopi conoci, Sres. Rufo Wever y Juan Chabaya (Padu) Lampe, a compone y graba e ritmo y melodia tipico di Aruba.
Na aña 1952 e dos musiconan a compone nos actual himno di Aruba. Nan a sinti e necesidad pa compone un piesa cual lo mester expresa amor di nos pueblo pa nos isla y lanta sentimento patriotico di cada persona. E grupo di musica y canto ‘De Trupialen’, bou direccion di Frère Alexius, a hinca e cancion aki den nan repertorio y asina su popularidad a crece. Popularidad di e cantica a bira mas grandi ora cu na 1954 riba iniciativa di Frère Alexius, Radio Kelkboom a graba e cantica riba un disco 78 rpm, canta pa ‘De Trupialen’ y compaña riba piano pa Padu Lampe. Na un forma espontaneo otro instancia priva y oficial a cuminsa uz’e na occasion importante. Riba dia 25 di februari 1976 un comision instala pa Gobierno a haci un recomendacion pa uza “Aruba Dushi Tera” como nos himno nacional y den ritmo di wals. E comision a propone pa añadi un couplet mas na e cantica. Señor Hubert (Lio) Booi, cu su inspiracion, a añadi na e ultimo couplet e frase: “…cu Dios por guia y conserva su amor pa libertad”. Cu e frase aki e ta elogia e gran cordialidad di e pueblo di Aruba y su amor pa libertad.
Dia 16 di maart 1976, Gobierno di Teritorio Insular di Aruba, a aproba ‘Aruba Dushi Tera’, como himno oficial di Aruba. Dia 18 di maart 1976, durante un acto oficial den Wilhelmina Stadion (awor Stadion Guillermo Prospero Trinidad), a proclama ‘Aruba Dushi Tera’ como e himno nacional di Aruba. Tabata un presentacion bou guia di Sra. Maybeline Arends-Croes cu acompañamento di orkesta harmonico di Aruba dirigi pa Sr. Hesus Maria (Joy) Kock.
Protocol pa uzo di nos Himno:
Ora cu ta canta Himno tur hende ta para recht cu su mannan cada banda di su curpa.
Ta wak den e direccion di e Bandera, sino den direccion di e cantante of un mandatario presente.
No ta permiti pa hende homber tin algo bisti riba nan cabes. Hende muhe si por keda cu nan sombre bisti.
Durante di e Himno, tur hende ta para keto y no ta papia.
Ora cu e Himno caba di ser presenta no ta bati man.
Ministerio di Cultura conhuntamente cu Departamento di Cultura Aruba y Comision Celebracion Dianan Nacional ta uni hunto den cumpli na informa y educa nos pueblo Arubano riba nos simbolo di identidad. E aña aki celebrando ya su 45 aniversario. Un simbolo di nos identidad creando union di un solo pueblo Arubano.