E trabow di trahado social, specificamente riba tereno cu ta trata cu husticia, no semper ta uno facil, pero si uno sumamente importante pa nos comunidad. Pa medio di diferente proyecto, Stichting Reclassering en Jeugdbescherming Aruba ta traha pa re-enforsa tanto adulto y hoben cu a haya nan mes den problema cu husticia, pa nan por reintegra den nos comunidad positivamente y hiba un bida stabiel, cu menos chens riba re-incidencia.
Seraida Pemberton-Leonard, actual directora di Stichting Reclassering en Jeugdbescherming ta refleha riba su trayecto na e organisacion y e diferente proyectonan cu e fundacion a sa di logra den transcurso di tempo. E ta sinti su mes orguyoso di por a forma parti di e desaroyo y implementacion di e departamento di Alternatieve Sancties, e Leerwerktraject, Mentorenproject y varios proyecto mas, di cual algun a ricibi reconocimento internacional riba tereno humanitario y social. Coleganan a expresa nan palabranan di exito y a conta di nan experencia trahando cu Seraida como un trahado balente, y un bon ‘motivational leader’ cu ta semper habri pa inovacion.
Sra. Pemberton-Leonard a expresa su gratitud di por a traha cu señora Cristina v/d Berg, un pionero local riba tereno di reclassering aki na Aruba, y a indica cu esaki ta un momento extra special pa su persona, mirando cu Stichting Reclassering en Jeugdbescherming Aruba ta celebrando su di 60 aniversario e aña aki.
Stichting Reclassering en Jeugdbescherming Aruba ta boga pa un miho clima social riba nos isla y ta realistico cu esaki ta solamente posibel den colaboracion cu diferente instancia y cu comunidad henter. Na momento cu un persona ta dispuesto y ta ricibi e guia necesario pa reintegra su mes, e sosten cu e ta ricibi na cas, den bario y riba tereno laboral tambe ta importante pa garantisa un resultado positivo y duradero.
Prevencion ta cuminsa cu educacion y pa duna bek na nos comunidad, Stichting Reclassering en Jeugdbescherming Aruba lo lansa un programa cu hopi tips practico y gratis riba tereno di desaroyo personal, di famia y relacion, maneho di placa y maneho di tempo liber. Stichting Reclassering en Jeugdbescherming ta invita un y tur pa sigi tur desaroyo riba e Facebook page Stichting Reclassering Aruba.
