Gabinete Wever – Croes ta hiba un maneho innovativo integral den cual e ser humano ta central. Den cuadro di esaki e Ministerio di Asuntonan General ta traha hunto cu Futura, cual ta e fundacion cu ta encarga cu realisacion di proyectonan cu tin di haber specificamente cu innovacion.
Prome Minister Evelyn Wever-Croes, den su Jaarverslag 2020, a duna di conoce cu casi a base diario departamentonan ta haci un of otro esfuerso cu tin di haber cu innovacion. Un di esaki ta encera e digitalisacion di e proceduranan di e rijbewijs nobo, cual desde december 2020 ta wordo otorga door di Dienst Burgerlijke Stand y Bevolkingregister. Cu e cambionan aki cu a keda introduci, ta aumenta e siguridad y confiabilidad di e rijbewijs. Tambe tin aumento den e proceso di eficiencia, pa cual e tempo di espera tambe a wordo reduci.
Algun otro proyecto innovativo realisa ta:
E-Goverment cual ta enfoca riba mehoracion di e servicio cu departamentonan di Gobierno ta brinda na cada ciudadano y pa mehora e experiencia di cada ciudadano, na momento cu nan ta bishita un di e departamentonan aki. A introduci eForms DEZHI cu ta encera e proceso di registracion di permisonan di negoshi cual a wordo digitalisa na 2020 na Departamento di Asuntonan Economico. Un otro proyecto ta Happy Flow 2.0, cu ta facilita e proceso di biahamento den tempo di COVID-19, door di haci e proceso pa biaha sin contacto.
Tambe Gabinete Wever – Croes a pone atencion na innovacion social, cu ta encera programanan y proyectonan dirigi riba stimulacion di creatividad y pa amplia e capacidad di conocimiento di pueblo Arubano. Esaki a tuma lugar a traves di varios proyecto den cooperacion cu “Aruba Youth Impact Cafe” hobennan vulnerabel cu enfoke riba e tema ‘Design Thinking’ pa stimulanan pa pensa riba solucionnan creativo pa retonan den comunidad. Aña 2020 a enfoca riba e COVID-crisis.
Un otro proyecto cu no por keda sin menciona ta den cuadro di retencion di talento cu enfoke riba habilidadnan necesario pa trabounan di futuro. Den cuadro di esaki e proyecto piloto e-Learning a wordo lansa na 2019, cu e meta pa desaroya “21st Century Skills” cerca nos muchanan. Despues di e implementacion di e structura cu tabata un exito na Cacique Macuarima y Aterima, 4 klas a keda destrosa door di un candela y tur aparato a bay perdi.
Cu ayudo di Futura y partners, Cacique Macuarima a bolbe habri scol cu 4 klas completamente renoba y nan eBoards (borchinan digital) como parti di e cooperacion cu e proyecto ‘e-Learning Pilot Project’. Mester menciona cu e proyecto ta sostene e ‘Plan Educacion Nacional 2030 (PEN) y a wordo diseña y implementa den cooperacion cu stakeholders den e sector di enseñansa, incluso Minister di Enseñansa. E di dos fase a inicia na 2020 na Colegio Pastoor Kranwinkel y na november 2020 e scol a ricibi 13 eBoards. E di dos fase di Colegio Kranwinkel lo inicia den e prome kwartaal di 2021.
Prome Minister Evelyn Wever-Croes: “Asina por menciona diferente proyecto innovativo cu tin tambe cu SKOA y otro scolnan rond Aruba. Ora cu mira bek, por mira cu Gabinete Wever – Croes a anuncia 2020 como e aña di innovacion y por a mira cu esaki wordo realisa tambe den diferente sector rond Aruba”.
