Virginia, USA:
Dulles International Airport, Virginia: Dialuna, Emma Coronel Aispuro di 31 aña a keda deteni na e aeropuerto Dulles International na e estado di Virginia.
Emma ta wordo sospecha di ta envolvi den e traficacion internacional di droga hunto cu su casa y tambe e ta wordo sospecha di a yuda su casa den e intentonan pa huy for di prison. Esaki ta locual Ministerio di Husticia Mericano a anuncia.
Emma ta wordo oficialmente sospecha di ta envolvi den traficacion grandi di heroina, cocaina, wiet y Crystal meth pa Merica. Emma Modesta Coronel Aispuro tin 31 aña y tin dos yiu muhe cu El Chapo, Emma tabata un ex Reina di beyesa hubenil.
Awe, diamars e lo mester presenta dilanti hue na corte federal di Washington. Banda di ta wordo sospecha di traficacion di droga, e ta wordo sosopecha tambe di a yuda El Chapo den su huymento espectacular for di e prison-Altiplano na Mexico na 2015. El chapo a laga traha un tunnel cu ta yega te den su cel y riba 11 juli 2015 e la huy for di e prison.
El chapo ta wordo mira como e hefe prinicipal di e Sinaloa- Cartel di droga. Hunto cu entre otro Ismael ‘El Mayo’ Zambada, tana tabata pa añanan largo na cabes di e organizacion criminal gigantesco aki. El Mayo ainda ta wordo considera e hefe grandi, mientras e yiunan di El Chapo, miho conoci commo Los Chapitos, a tuma e negoshi di nan tata over y ta sigui cu ne.
Na 2019 El Chapo a keda sentencia cu un castigo di prison di bida largo, pa contrabando di droga na gran escala y tambe pa varios likidacion.