Agente policial a tira un dama probablemente turista, door cu e lo a hit and run varios auto

by Admin February 20, 2021

February 20, 2021 0 comments 141 views

Savaneta: Diabierna algo prome cu 10’or di anochi, polis tabata siguiendo un Kia Picanto blanco numera V-4404, maneha pa un dama aparentemente turista. E chauffeur di e auto aki tabata bayendo direccion pariba y a hit and run na rotonde Pos Chikito y despues na altura di Citgo Savaneta e la bolbe hit and run y no a para.

E auto a sigui bay direccion San Nicolas y segun polis e la sigui dal varios auto riba e caminda, na altura di House of cakes e la dal frontal contra un autobus.

Na dado momento entre House of Cakes y Club Arias, polis a logra para e Kia Picanto, nan a cera esaki y a pone a subi acera y bay pega contra un cura di waya. Den e impacto aki un meter di awa a wordo kibra. Algun persona cu ta biba eybanda lo a scucha como 5 tiro cay. Segun polis e dama chauffeur lo a manda auto riba nan y esaki a pone cu nan lo a los tiro, den cual a e dama lo a ricibi un tiro y a keda herida.

Polis mesora a pidi refuerso di varios colega y tambe a pidi ambulance cu hopi urgencia, mesora a cera caminda pa cuminsa cu un investigacion. Tambe a pidi pa presencia di departamento tecnico di polis, mirando cu varios tiro lo a cay y mester busca e hulsnan.

E Dama, kende aparentement lo tabata bou influencia di un of otro substancia a wordo transporta pa hospital, mientras e caminda a keda cera pa polisnan haci mas investigacion.

Vocero suplente di polis Sra. Liliana Rasmijn, a manda e siguiente relato pa publicacion.

CUERPO POLICIAL ARUBA TA INFORMA

Persecucion pa chauffeur femenino bou influencia di un of otro substancia

Awe nochi despues di 9’or a cuminsa un persecucion formal entre polis y un Kia Picanto blanco numera V-4404 pa motibo cu e dicho auto tabata core inresponsabel riba caminda. E chauffeur di e Kia Picanto a ocasiona un accidente na retonde di Pos Chiquito y a sigui bay direccion pariba na altura di Citgo Savaneta la bolbe ocasiona un otro accidente y a sigui bay direcion San Nicolas. Na altura di retonde FTA patruya di San Nicolas a topa cu e dicho auto. E patruya a dune e chauffeur señal pa para pero ta keda nenga di cumpli cu esaki . A cuminsa un persecucion formal na unda e Kia Picanto a dal den diferente auto y despues dal frontal cu un autobus na altura di House of Cake Savaneta. Na dado momento a logra para e auto pero e chauffeur femenino a cuminsa manda e auto dirigi riba polis. Polis lo mester a usa su arma reglamentario y a los tiro, pero asina mes e chauffeur femenino a sigui core e auto. Polis cu refuerso a logra para e dicho auto aki pero aki ta unda cu e chauffeur femenino cu tabata bou influencia di un of otro substancia a resisti formalmente cu e agente policial siendo cu e ta herida. Agentenan a domina e situacion y ta logra deteni e persona femenino aki.

Mirando e situacion serio aki e departamentonan concerni di KPA entre otro Polis di trafico y Polis technico a yega na e sitio pa asina cuminsa cu e investigacion. Landsrecherche y Slachtofferhulp tambe a wordo poni na altura.

E situacion di e chauffeur femenino ta stabiel y a wordo hiba hospital pa mas tratamento medico avansa.