Rudy Richardson (MEP): MEP, UNICO ORGANIZACION POLITICO CU A WORDO FUNDA PA DEFENDE E LUCHA ARUBANO (part 2)

Movimiento Electoral di Pueblo cu su Ideologia Social Democrata ta pa caba cu tur segregacion y division cu tabata existi riba e Isla aki. Desde su fundacion e ideologia di MEP ta Social Democrata, caminda e ser humano ta central. Den cuadro aki paritdo MEP a wordo acepta na 1980 como miembro di Socialista Internacional den un congreso cu a tuma lugar na Madrid, Spaña. Mas despues MEP a bira tambe miembro di COPPPAL (Conferencia Permanente de Partidos Politicos de America Latina y Caribe). Ambos organisacion tawata instrumental den e lucha di e peublo Arubano pa logra su Status Aparte. Betico Croes efm a cuminsa e tempo ey cu accionnan extra parlamentario cu e unico meta pa haya mas oido pa e causa di Aruba cerca Hulanda. 

Dia 18 di Maart 1973 un manifestacion masal a ser organisa den Wilhelminastadion pa demostra dilanti di e parlamentarionan di Hulanda y Antiyas cu Aruba ta  rechasa e federacion Antiyano y ta decidido den su lucha pa logra su libertad, esta Status Aparte. 

Dia 18 di Maart 1975 MEP a organisa un grandioso Marcha di Libertad cu flambeu den cayanan di Oranjestad. 

Alavez den e mesun aña ey un mocion di Eilandsraad a wordo acepta cu a haci posibel pa entama misionnan pa exterior en busca di apoyo pa e lucha di e pueblo Arubano. E misionnan aki tabata pa entre otro Colombia, Venezuela, Costa Rica, Panama, Hulanda, Inglatera, Merca, Nacionan Uni y Organisacion di Estadonan Americano (OAS). 

Mescos cu cualkier otro pais na mundo, Gobierno Insular a tuma e decision cu 18 di Maart ta bira nos Dia Nacional, esta nos Dia di Himno y Bandera. Den cuadro aki un comision di Himno a ser institui di 21 di Januari 1976 cu a haya e tarea pa conseha gobierno si mester haci ‘Aruba Dushi Tera’ himno nacional di Aruba y si esaki ta afirmativo, ki sorto di ritmo sea marcha of wals tin cu wordo uza. E comision den forma unanime a vota na fabor di interpretacion di e himno den ritmo di wals. E comision a duna su recomendacionnan na Gobierno Insular y dia 16 di Maart 1976 Eilandsraad di Aruba a aproba’Aruba dushi tera’ como himno oficial di Aruba. E comision tabata consisti di Maybeline Arends Croes, Juan Chabaya (Padu) Lampe, E. Bennett, Hubert (Lio) Booi, Rufo Wever y secretario Juan E. Wever. 

Riba e mesun fecha 21 di Januari 1979 Gobierno Insular a instala tambe un Comision di Bandera cu e tarea pa organisa un concurso den pueblo pa un diseño di un bandera di Aruba. Mescos cu tabata e caso cu e himno di Aruba, riba 16 di Maart 1976 Eilandsraad a aproba e diseño di e bandera oficial di Aruba. Comision tabata Julio Maduro, Wouter van Romondt, Ronald Donk y como secretario Juan E. Wever. Aprobacion di Ortografia Etimologico: dia 5 di Mei 1976 Gobierno Insular a instala un comision di Ortografia pa formula y recomenda un ortografia oficial pa Papiamento di Aruba.. Dia 13 di September 1976 e comision a entrega su recomendacionnan na Gobierno Insular y dia 30 di October 1976 Eilandsraad a aproba e ortografia etimologico. Comision tawata Jossy Mansur, Ofelia Paris, Hubert Booi, Holmo Henriquez, Thomas Ruiz, Julio Maduro, August Croes, Salomon Fingal y secretario Juan Thijsen.

Despues di 35 aña di nos Status Aparte nos mester sigui profundisa nos derecho di Autodeterminacion. Libertad politico ta bin cu responsabilidad. Nos mester percura pa un pais unda enseñansa ta keda central den nos bida y desaroyo economico inclusivo.  Nos mester ofrece nos pueblo mas enseñansa na trabao (apprentice opportunities), promove un cultura di entrepreneur, inverti y mentor nos hobennan profesional, percura pa proteccion laboral (CAO’s den sector priva) y condicionnan social di nos hendenan, proteha gruponan vulnerabel manera esnan cu ta migrante den nos mercado laboral pa limita abuso y explotacion inhumano. Nos pilar economico mas importante cu ta turismo lo tin retonan e siguiente añanan y ta importante nos upgrade educacion di nos hendenan pa por ta mas productivo pa por competi mas aun cu un mercado turistico cu mas demanda. Pa p’ariba di brug mester bin cu crowdfunding (famianan di e area) mester cuminsa netwerk mas y haci inversionnan hunto pa por logra mas prosperidad den areanan cu a keda den pobresa of marginal. Sector bancario a mustra resistencia pa  inverti den e progreso economco di Arubiano\Local cu tantisimo red tape.  Na 2016 crowdfunding global a yega $35.2 billon y $324 millon di esaki ta di Latino America y Caribe. Nos mester explora diferente sector manera esun primario y cannabis medicinal pa menciona algun pa crece e GDP per capita di p’ariba di brug y crea un clase media mas grandi na Aruba. Mi ta un di e poco politiconan actual cu a propone esaki desde inicio di mi carera politico, awo ta tempo pa haci esaki realidad como parlamentario di MEP hunto cu nos team completo di profesionalnan. Cu construccion di Secrets hotel na Seroe Colorado lo duna un empuhe atravez di San Nicolas Business Association (SNBA) pa funnel mas tanto e desaroyo economico cu habitantenan di p’ariba di nos Isla. Nos por a wak e boycot economico contra proyectonan pa p’ariba e ultimo 35 añanan di nos Status Aparte, esaki sigur no lo por sigui asina. “No tin lucha sin sacrificio y no tin sacrificio sin gloria.” Betico Croes