ORANJESTAD – E hombernan R.R. y S.C., a presenta den sala di Corte pa e caso penal cu Ministerio Publico a cuminsa contra nan.
Aruba Native por a compronde cu Fiscal a acusa nan cu riba 19 Juni 2020, nan a maltrata severo e homber J.A. Tambe cu nan a usa arma contra J.A. door di cual J.A. a sufri herida severo. Ademas S.C. ta wordo acusa di a viola e ley di toque de queda riba 3 Mei 2020. Den sala di Corte tambe tabata presente e victima J.A. cu documentonan pa demanda daño cu el a sufri.
Hues a puntra R.R. si ta berdad di a maltrata J.A. Segun R.R. nan a bay cas di J.A. pa papia cun’e. S.C. a pidi R.R. pa bay cun’e pa papia. R.R. a cuminsa papia cu J.A. y el a bisa cu e ta canza di problema y a bay coy un machete. Segun R.R., J.A. a bay cu machete riba dje. R.R. su amigo S.C. a hal’e un banda ora J.A. a zwaai machete. E ora ey R.R. a core bay. Hues a bisa cu ta asina cu J.A. a bay resulta den hospital cu heridanan severo entre otro kaak kibra. Segun R.R., tur cos a pasa asina liher y e no sa con J.A. a resulta herida. J.A. ta tata di e amiga di R.R. y R.R. kier a bay papia riba e problema cu lo tin.
Hues a puntra S.C. pakico el a bay cu R.R. na cas di J.A. Segun S.C. el a subi den e auto cu intension pa haya un lift pa cas. Na Santa Cruz, R.R. a bay na un cas y a pidi S.C. pa baha cun’e. El a bisa cu R.R. tabata su dilanti y a yama na e cas. E homber J.A. tabata hopi rabia y a discuti cu R.R. y a bay paden y bolbe cu machete. J.A. a zwaai cu machete riba R.R. y el a pusha R.R. un banda. Segun S.C. el a kita e machete di J.A. y a haya un blackout. El a mira su curpa na sanger y yen herida na su curpa. El a bisa cu e ta kere cu el a dal J.A. cu e machete pasobra e tabatin e machete den su man.
J.A. a demanda 40 mil florin di daño inmaterial door cu e ta sufri di trauma despues di e maltrato severo. El a bisa cu ainda e ta sufri di efectonan di man kibra. E lo mester bay Colombia pa drecha su kaak cu a fractura y no a keda bon. E tin problema cu comemento. Segun J.A., el a keda hopi tempo sin por traha. El a bisa cu e ta bao di tratamento di psycologo. E tin hopi problema cu stress y desconfianza.
Fiscal a bisa cu e ta haya legalmente proba cu R.R. y S.C. a maltrata J.A. severamente. Fiscal a bisa cu J.A. a wordo ataca door di 3 homber y cu e otro persona K. a wordo laga liber, door di un bruhamento pero lo bay cuminsa un caso penal contra dje.
Fiscal ta haya tur e declaracion di R.R. y S.C. no creibel. Fiscal ta kere cu nan a traha e storia cu nan lo a wordo ataca cu machete y asina hustifica e maltrato cu nan a haci cu J.A.
Fiscal a exigi 24 luna di prison di cual 6 luna ta condicional cu un tempor di prueba di 2 aña. Esaki bou guia di Reclasering. Pa loke ta e demanda, Fiscal ta haya e demanda di 40 mil florin inmaterial aceptabel mirando cu ainda J.A. ta sufriendo. Pa e violacion di toque di queda, Fiscal a exigi 40 ora di trabao of 20 dia sera pa S.C. Dentro di algun siman, Hues lo bay dicta sentencia.