Durante eleccion 2017 politiconan a haci asina tanto promesa na electorado, tanto na pueblo como na votadornan en particular, y awor manera un Hudas ta pidi pueblo pa no cay pa promesa ni pa cumpramento di voto. Netamente esnan cu a hinca hopi placa den campaña, ta pidi partidonan pa no bay gasta placa na materialnan di campaña, pero pa nos bay un campaña a base di programa y contenido. Hudas sinembargo ta keda chikito ora como toppunt di hipocresia, cu e proposito pa gana simpatia di e electorado, ta bisa cu e situacion cu Aruba ta aden actualmente no ta tempo pa haci politica cu n’e, mientras cu na grandi a anuncia desde aña pasa cu campaña a start.
Aña 2021 ta aña di eleccion, pero lo ta un eleccion peculiar, mirando cu riba 13 di november 2020, gobierno di Aruba a acepta e condicionnan Hulandes y awor nos por papia di presencia di un COHO caba y pronto tambe e RAFT, sin cu esakinan a wordo pasa den ley ainda. Riba 13 di november 2020 nos autonomia a cabi wordo entrega, apesar cu gobierno kier pone nos pueblo kere cu tur esaki ta sosode den consulta cu Hulanda, of miho bisa cu COHO. E entrega kier wordo bendi como sifuera gobierno lo tin “medezeggenschap” riba loke Hulanda ta exigi of presenta.
E realidad ta cu Parlamento, como e organo mas importante y mas halto di nos constitucion, na cierto momento a wordo humiya y degrada den su status. No solamente nos Parlamento a bay riba un tercer plano den nos sistema politico den Reino. COHO ta “regisseur” y “choreograaf” di tur loke ta sosode e siguiente 7 añanan por lo menos y COHO ta responsabilisa na “politiek Den Haag” y no na nos Parlamento. E desaroyo aki ta haci nos pueblo, cu ta scohe su representantenan, tambe lo cay den di tres plano y ta bira politicamente “cuidadano di tercera categoria”.
Pakico? Pasobra universalmente ta wordo considera y reconoci, cu excepcion den paisnan totalitario y dictatorial, cu cada pueblo ta soberano. E pueblo soberano aki, na un forma democratico, ta encomenda na un grupo di hende, esta Parlamento, su soberania, pa asina por represente y dicidi den su nomber. Y awor nos Parlamento, SIN tin e “blessing” di su pueblo, a opta pa entrega soberania di nos pais y di nos pueblo na Hulanda, na momento cu nan tambe a acepta y sostene e acuerdo cu gobierno di Aruba a cera cu Hulanda.
E rol di Parlamento, cu presencia di COHO, ta simplemente uno di “windowdressing” pa Hulanda no mustra malo riba e plano internacional! P’esey e COHO y RAFT mester a bira un “consensusrijkswet” ya cu esaki ta elemina e caminda cu nos pais como pais autonomo por a cana via di Nacionnan Uni. Un “rijkswet”(AMRB) imponi conforme nos Statuut si e deseo di Hulanda ta pa tuma over, lo a duna nos e derecho di acerca Nacionnan Uni, particularmente e Comision di Decolonisacion.
Dicon Parlamento completo ta keda complice y culpabel di e acto aki? Pasobra desde cu Hulanda tabata pone e presion, uzando e pandemia di COVID-19 y e saco di placa pa ayudo, Parlamento a keda manera un tiger di papel, tanto coalicion cu a papia palabra duro, como oposicion cu tambe a zapatia. Pero nan no a opta, segun Statuut, pa coy nan caminda y bay papia cu tanto gobierno como Parlamento Hulandes di un banda, y di otro band no a haci ningun sorto di esfuerso pa acudi na Nacionnan Uni, esta e Comision di Decolonizacion, pa asina presenta y defende e caso di Aruba.
Hustamente esnan cu a hinca nos den e situacion aki, tin pretencion cu ta nan tin e solucion. Pero realmente e “uitvoeringsagenda” di “Landspakket Aruba” cu a keda concorda, ta practicamente encera e maneho of programa di gobiernonan pa e siguiente aña. P’esey UPP ta comprende e motibo pakico tin politico ta bisa pa partidonan no bay haci promesa di campaña. UPP for di 2013 a bin ta mustra cu nos mester tabata tin un consenso nacional pa cu nos problemanan. Na 2014 nos a propone pa bini cu frente nacional, unda cu den un Dialogo Nacional nos ta yega na un Compromiso Nacional pa asina enfrenta Hulanda. Na 2017 y atrobe na april 2020, nos a urgi gobierno, Parlamento di Aruba y diferente otro gremio- y partidonan pa nos bay den e direccion ey. Lamentablemente e union, cu ta necesario, tabata for di miras di casi tur hende.
Apesar cu eleccion di e aña aki ta uno peculiar, unda cu Parlamento a keda degrada, ta importante pa pueblo expresa su mes. Esta cu pueblo mester duna di conoce si ta aproba of desaproba e entreguismo cu a sosode riba e diabierna scur den november. Eleccion 2021 mester wordo considera como un “referendum” pa nos scohe si nos ta recobra e posicion di nos Parlamento bek, e soberania di nos pueblo y recobra sigur e Status Aparte cu Betico Croes a yama e “klompi di diamante” cu nos mester defende.
P’esey UPP ta ofrece REBOOT 2.0, unda cu nos por RECOBRA nos Status Aparte pa medio di un REFORMACION di nos gobernacion, nos democracia, nos economia, finanzas publico y sistema educacional, social y di salubridad, por medio di un DIALOGO Y PARTICIPACION REAL. Aruba, no solamente dor di e pandemia mester drenta un “Normal Nobo”, pero dor di mal gobernacion di ultimo tempo, nos mester conoce un comienso nobo, y e REBOOT 2.0 ta “E MANECE NOBO PA ARUBA”.