ORANJESTAD – Awe mainta e hombernan Z.D., M.D., D.Z., N.M., T.B., A.M. a presenta den sala di Corte di Husticia di Aruba, pa e caso penal cu Ministerio Publico a cuminsa contra nan. Tur ta wordo acusa di posecion y traficacion di mas cu 5000 kilo di cocaina riba 25 Februari 2020. Z.D. ta capitan di e barco y M.D. ta e hefe mecanico. Ariba barco “Aressa” a haya mas cu 5000 kilo di cocaina scondi den un tanki di diesel.
Aruba Native por a compronde cu den sala di Corte tabatin 5 traductor. Dos di Corte di Husticia y 3 a wordo busca cu ta domina e idioma Servio. Esey ta e idioma cu e sospechosonan, procedente di Montenegro, ta domina. Abogado mr. Polat di Hulanda no por a bin Aruba door di medidanan di Covid y a atende e caso via video conference. Abogadonan mr. Lejuez y mr. Arendsz Marchena tabata presente. Tratamento di e caso aki a dura te den oranan di atardi.
Hues a repasa e relato di Polis. Guarda Costa a haya informacion 24 Februari 2020 di autoridad di Marina Colombiano cu un go fast a caba di hiba un lote di droga na e barco Aressa cu tabata navega den awa territorial di Venezuela. Fiscal a pidi Guarda Costa vigila e barco. Dia 24 Februari 2020 mas o menos 8.30 di anochi e barco tabata den awa territorial di Aruba y Fiscal a duna orden pa intercepta e barco. Mas o menos 10.30 Guarda Costa a ordena e barco pa stop y a aborda esaki trece Aruba.
Na waf a usa cacho anti droga cu a reacciona. A haci investigacion den e barco y a constata cu den e cuarto di machine tin un compartimento cu schroefnan a wordo gelos. A resulta cu e ta un tanki di diesel bashi, den cual a haya 211 bulto di droga. A confisca esakinan y a resulta cu tabatin cocaina den nan. A pisa esakinan cu a resulta 5108,6 kilo y investigacion di laboratorio a constata cu ta cocaina. A haya salba bidanan den e barco y den un tabatin 2 celluar y dos cargador scondi. Polis a constata cu tin un catrol y cabuya cu net. Ta sospecha cu a usa esaki pa carga e droga abordo di e barco.
Fiscal a bisa cu e caso aki ta excepcional y mirando e cantidad di droga cu a keda confisca, esaki ta un record tristo pa Aruba. Fiscal a mustra cu door di tip di Marina Colombiano, Guarda Costa a intercepta e barco Aserra cu mas di 5000 kilo di cocaina. Abordo tabatin 11 sospechoso. Dia 23 September 2020, e sospechoso M.D. a declara cu e tripulacion tabata sa di e traficacion y cu a haci esaki door di nan tur tin debenan pa paga. Tabatin discusion cu e capitan Z.D. door cu e palabracion tabata 1 Ton pero despues a resulta cu ta 5 Ton. Fiscal a sigui bisa cu a confronta e declaracion di M.D. na e otronan y a scucha nan ta papia cu Polis sa tur cos. Tambe a confronta e capitan Z.D. cu e declaracion di M.D., kende a bisa cu un hende mester a papia y cu Polis sa tur cos. For di esaki por conclui cu loke M.D. a declara, ta e berdad.
Pa cu e castigo, Fiscal a mustra cu tin tres categoria. E ta haya e capitan Z.D. mester haya mas castigo pasobra no solamente e ta e capitan sino tabatin e contactonan cu e organisadornan di e traficacion di droga. Fiscal a exigi 15 aña di prison.
Pa e tripulacion: D.Z., N.M. T.B. y A.M., Fiscal a exigi 12 aña di prison mientras cu pa M.D., kende ta e unico sospechoso cu a coopera cu investigacion, el a exigi 9 aña di prison. Mayan den Corte ta sigui cu e resto di e grupo y por spera dentro di algun siman e sentencia.