ORANJESTAD – Corte Superior awe merdia a atende via video conference e apelacion di e caso IBIS, caminda tin 6 sospechoso. Di e 6 sospechosonan, 3 cu a wordo declara liber, Ministerio Publico a apela e sentencia mientras cu Paul Croes, su señora Melony Croes Paesch y señor Wever a apela e sentencia contra nan.
Ex Minister Paul Croes compaña pa su señora y Abogado
Aruba Natvive por a compronde cu e tabata un asina yama “regie zitting” caminda Hof ta duna abogadonan oportunidad pa haci peticion pa investigacion cu nan ta desea pa nan cliente. E biaha aki Paul Croes ta wordo representa pa mr. Sulvaran di Curacao y mr. Illes di Aruba a haci un serie di peticionnan por escrito na Hof y Ministerio Publico a haya copia di esaki.
Den sala Corte tabata presente abogado mr. Marchena cu a presenta señor Di Vecchia, kende a wordo declara liber pero Ministerio Publico a apela. Abogado mr. Lejuez a representa e dama Martinus, kende tambe a wordo declara liber pero Ministerio Publico a apela. Tambe mr. Lejuez a representa señor Wever, kende a haya un multa y a apela.
Abogado mr. Oomen a representa e dama Nuñuez kende a wordo declara liber pero Ministerio Publico a apela e sentencia. Abogado mr. Illes a representa Paul Croes y su señora Melony. Mr. Sulvaran tabata na Curacao.
Ta asina cu ni Di Vecchia, ni Wever a presenta, pero nan abogado si.
Procurador General (PG) a reacciona riba e promer peticion di mr. Sulvaran y mr. Illes pa scucha un trahador na KIA. PG a bisa cu e ta rechaza e peticion aki. Na opinion di PG, e no ta haya cu tabatin violacion di derechonan di Paul Croes. Segun PG, tabatin limitacionnan pa Paul Croes den KIA pero no ta haya cu a viola reglanan di Derecho Humano.
Hof a puntra di parti di PG y e abogadonan, cuanto tempo mas o menos lo bay tuma ora di tratamento di e caso. PG a bisa 3 pa 4 ora, e abogadonan tabata entre 20 minuut y 1 ora.
Hof despues a pospone e caso un rato pa bay evalua. Despues nan a bolbe y a informa cu dia 23 Februari 2021 pa 1.30 di merdia lo dicidi riba e peticionnan di mr. Sulvaran y mr. Illes.
Hof a bisa tambe cu dia 23 Februari 2021 lo fiha un fecha na September 2021 pa tratamento di e caso. Hof a bisa e abogadonan cu ta calcula 2 dia y posibel 3 dia pa tratamento di e caso aki.
