For di hopi tempo tin un disgusto den pueblo pa loke ta e manera con e maneho pa “rijbewijzen” ta hinca den otro. Esaki ta e motibo tambe dicon na september 2019 a institui un comision “nieuw beleid rijexamens”. Sinembargo te dia di awe ainda tin hopi keho riba tur aspecto di e maneho.
COMISION “NIEUW BELEID RIJEXAMEN”
Prome cu nos a wordo confronta cu e pandemia ya caba tawata tin un lista largo di espera pa loke ta por inscribi y consecuentemente haya fecha pa pasa rijbewijs. Esaki kisas door cu poblacion a crece y mas hende ta aplica pa esaki. Pero tambe e comision aki mester a conseha Minister si e tarea di pasa rijbewijs ta un di e tareanan cu mester keda cerca Cuerpo Policial. Mas aun ainda si nos wak cu na otro paisnan, manera por ehempel Hulanda y Corsow, e tarea aki no ta uno mas di e cuerponan policial. Pa e motibo aki a instala e comision na 2019 cu ta conta cu participacion di tur “stakeholders”. Sinembargo te dia di awe no a yega na un solucion concreto pa e puntonan menciona.
VERENIGING RIJSCHOLEN ARUBA
Recientemente a reuni tambe cu representantenan di e vereniging di “rijscholen” na Aruba. Nan tambe a trece pa dilanti cu nan ta ricibi diferente keho di nan clientenan pa loke ta full e proceso di inscripcion y pasa rijbewijs. Nan a indica cu e lista di espera pa por haya fecha pa pasa rijbewijs ta 4 pa 5 luna. Nan a trece pa dilanti cu atraves di un sistema digital lo por baha esaki substancialmente. Pero tambe ta importante pa yega na un rijexamen den cual tur “rijschool” por a contribui. Asina por yega na material di duna les unifica cual ta hisa e calidad di les cu ta wordo duna y consecuentemente ta hisa seguridad den trafico cual ta cumbini nos tur.
PA CONCLUI
Nos ta pidi Minister di Husticia su atencion pa esaki, pasobra tin hopi hende cu ta depende di nan rijbewijs pa nan trabou. Y e problemanan aki ta perhudica nan den esaki. Ta importante pa den corto tempo mitiga tur e kehonan cu tin riba e proceso di “rijbewijzen” cual ta e inscripcion, parti teoretico y practico. E parti di “afgifte” a wordo pasa pa Censo recientemente y esaki ta cana sumamente bon aworaki.