Arthur Dowers miembro di fraccion di AVP den Palamento, durante conferencia di prensa, a mustra cu e kier a denuncia un crimen serio cu a bin ta tumando luga akin a Aruba, dor di Minister di Enseñansa, Rudy Lampe.
“Loke a bin ta tumando luga ultimo tempo, ta un crimen contra nos futuro generacion cu a tin ta tumado luga bou di e gobierno actual.
Aruba tin un Minister di Enseñansa kende ta un persona cu den mi concepto, tin hopi rabia den su curpa, e tin hopi frustracion full den su curpa y e ta bezig sacando esaki c tur occasion cu e haya, contra e trahadonan den enseñansa y studiantenan, riba nos famia y nos hendenan humilde y debil den nos sociedad.
Mi ta bisa esaki pasobra e Minister aki, Rudy Lampe, algun siman pasa Sali bin dilanti y acusa maestronan di colegio pariba, di cu nan ta corupto, sin bisa esaki cu asina hopi palabra pero tur hende sa cu e insinuacionnan cu el a trece dilanti y e forma con el a haci e expresionnan aki, ta pa prueba cu e hendenan aki a haci algo malo.
Pero ta hopi cla cu e maestronan aki no a comete ningun crimen y no a haci net nada robes pero un investigacion cu tabatin cual no a wordo haci completo, a crea un impresion eroneo.
Lamentablemente den e expresionnan di Minister Lampe, por a scucha e Minister bisa nan cu ‘tende, ami a bisa bosonan pa bay bou di un stichting, anto boso no tabata kier a bay bou di un stichting pero boso tabata kier a keda cerca y awor cu boso a insisti pa keda cerca mi, tuma loke ami tin pa bosonan awor.’
Pues claramente e minister aki ta sacando su rabia pasobra e no a logra di hinca tur e maestronan aki bou di un stichting y awor a bira saca su rabia dor di lastra nan y trece nan den un situacion di stress inmenso y haciendo esaki, Lampe a trece henter un sistema di enseñansa di educacion y formacion di nos hobennan den problema.
E minister aki a bin dilanti y gaña pueblo cu e maestronan aki ta actuando contra ley pa motibo cu nan no ta tene nan mes na e norma, caminda nan a usa e norma di 2014 na luga di usa e norma di 2016.
E palabra cu Minister Lampe a usa no ta algo cu mi por bisa asina sin mas cu loke Lampe ta contando pueblo, ta simplemente un mentira flagrante ya cu e homber aki ta un abusado y gañado, ya cu e normanan cu nan a usa ta normanan cu ta bisa di e minimo cantidad di les c’un maestro por duna un studiante.
E no ta bisa cu si un maestro duna un studiante par di lesuur mas cu esey lo tin un efecto negativo ya cu e normanan aki ta traha pa garantisa cu e much cu ta bay scol, ta haya e minimal cantidad di les cu por percura pa e por ta exitoso den e aña escolar cu e ta atendiendod.
Awor tin un Minister Lampe kende ta kehando cu tin algun studiante cu ta haya un tiki mas les pero esey por wordo cataloga como crimen?
Aña pasa minister Lampe a bin gaba cu el a corta 25 miyon den enseñansa anto awe e mesun Lampe aki ta yora cu un par di mucha a haya mas les.
Nos no mester lubida pueblo, cu nos ta bibando den momentonan dificil, den un pandemia, loke ta nifica cu hopi di e lesnan cu e muchanan aki ta custuma di haya, hopi di e interaccion cu tin entre e docente y studiante, a bira menos pero esey ta nifica tambe cu hopi di nos studiantenan a cay atras cu nan lesnan.
Aña pasa tur hende sa cu na momento cu e pandemia a dal, hopi mucha a bay over sin haya tur e cantidad di lesnan cu nan mester a haya, pues kico mas miho cu awor bo percura pa nan haya lesnan adicional y asina percura cu nan lo ta exitoso den nan carera.
AVP den pasaado banda di e lesnan obligatorio cu tabatin, nos a duna docentenan extra ora y tur e muchanan a bin scol caminda despues di ora di scol, boluntariamente nan a bin pa asina e studiantenan por a haya les pa asina nan ta exitoso y nan tabata exitoso.
Pesey no por compronde aworaki con un Minister di Enseñansa por scohe na prome luga pa tur siman cu e haya un chens, terorisa maestronan, terorisa werksternan, terorisa tur hende cu ta traha den mundo di enseñansa, djis simplemente pa su persona tin un satisfaccion personal.
Ora cu e caba di terorisa tur mucha- y maestronan, e consecuencia ta e efecto riba e studiantenan, caminda e hobennan aki no ta haya e lesnan den e forma adecuado, aunke e docentenan ta bringa pa duna lesnan pero por mira mas y mas docente cansa, por mira mas docente desespera pa proteha e derecho cu e muchanan tin, siendo cu e prome yama pa haci esaki ta e Miniter Lampe aki,” Parlamentario Arthur Dowers a declara.