ORANJESTAD – December aña pasa, a tuma diferente accion di control pa cu e taxistanan por ricibi nan Seyo di Oro. Departamento di Salud Publico, Departamento di Transporte Publico, Dienst Technische Inspecties y tambe Korps Politie Aruba ta invita tur taxista cu no a wordo controla ainda, pa por pasa libremente, diaranson awo di 8:30 di mainta te 11’or di mainta pa por haya nan control y asina por ricibi nan Seyo di Oro. Taxistanan lo por para net tegenover Oficina di Turismo (L.G. Smith Boulevard 8), den e aerea di parkeer den Linear Park (Surfside parking lot). Aki lo controla tur papel necesario como tambe lo controla riba e protocol di higiena y con esaki lo bay den practica.
Den pasado e accionnan tawata exitoso mirando e dedicacion di nos taxistanan pa tin tur cos na ordo pero tambe pa por mira e dedicacion y ehecutacion di protocolnan pa asina por limita e transmision di e virus bou nan mes, nan famia y nos bishitantenan. Mester remarca cu un total di 81 taxista, ya caba a haya nan Seyo di Oro.
Fabor tuma nota cu esaki ta e unico oportunidad unda lo brinda e servicio estilo di e drive thru. Pues si bo persona kier sigura e Seyo di Oro pa bo Taxi ta urgi pa haci uzo di e oportunidad aki diaranson awo.
Criteria necesario pa cu Taxi vergunning:
- Keuringskaart valido
- Exploitatie y rijvergunning valido
- Rijbewijs valido
Criteria mandatorio pa cu cumplimento di protocolnan di higiena:
- Bisti tapa boca (mask) na tur momento cu tin interaccion y/of un (of mas) cliente den e vehiculo
- Hand sanitizer disponibel pa e taxista y cliente(nan)
- Haci e areanan den e vehiculo cu ta mas uza/areanan cu ta wordo mishi frecuente limpi (manera porta/door handle), despues di cada cliente
- Ventila e auto pa algun minuut despues di cada cliente
- Mantene un lista di contacto di cliente (conteniendo nomber, telefon, hotel/adres, fecha)
- Tin un borchi visibel cu bo nomber, telefon y number di taxi
Un danki ta bay na tur taxista cu ta brindando nan servicio, pa continua di haci esaki teniendo cuenta cu e protocol di higiena. Si tin cualkier pregunta por haci esaki libremente via [email protected]
Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.