Awe 30 di December 2020, nos kier dedica Historia di Aruba na un persona, cu Aruba hamas lo por lubida.R
Recordando awe e di 43 aña di fayecimento di un gran musico Arubiano Sr. Rufo Wever.
Rufo Wever a nace dia 8 di december 1917 na Oranjestad, Aruba. Na edad di 6 aña e la bay les di piano y cu 15 aña e la forma parti di un orkesta Melody Boys. For di e tempo ey Rufo a cuminsa composita cantica, un di su prome composicionnan tabata e conocido Wals Arubanita. E la composita varios otro cantica y a graba disco internacionalmente. Rufo hunto cu Padu a composita Aruba Dushi tera.
Rufo Wever tras di su piano
Na edad di 24 aña mala suerte a toca na su porta, riba 16 di December 1941 den oranan di anochi na San Nicolas a sosode un accidente hopi cruel, un truck di Mariniers a boks contra un auto, den e auto tabata tin 4 persona, Prins Haribe, cu a fayece mesora door di e impacto fuerte y Sr. Rufo Wever kende a keda gravemente herida. E dos otro pasaheronan di e auto a keda levemente herida. Rufo den e accident aki a perde su brasa robes.
Na prome instante e la pensa cu te aki su carera como musico lo a yega, pero su amor y passion pa musica tabata demasiado grandi. Despues cu e la logra haya un protese pa su brasa robes, e la sa di domina su handicap y a cuminsa toca piano bek, e man robes tabata yuda e man drechi riba piano. Rufo tabata conoci no solamente na Aruba pero a yega di presenta internacionalmente na diferente canalnan di television, na Aruba, Corsou, Costa Rica, Venezuela y Puerto Rico. Rufo Wever tabata e tempo ey, un di Aruba su talentonan cu mas a destaca.
Rufo tocando piano pa T.V. na Costa Rica
E wals “Arubanita” tabata un di Rufo su prome composicionnan, cu na 1955 durante cu La Reina Juliana a bishita Aruba, e la baila e wals aki.
Hunto cu su bon amigo Padu Lampe, nan a compone ” Aruba Dushi Tera” cu despues di tempo a bira nos Himno Nacional.
Rufo tabata conoci pa traha cilindernan pa caha di orgel pa musica tipico di Antiyas.
Rufo trahando riba un cilinder di caha di orgel
Na anja 1964 Rufo a ricibi un plakaat for di Gezaghebber O. Henriquez
Na April 1975 Rufo a ricibi un condecoracion ” Ridder in de Orde van Oranje Nassau”
Diabierna 30 di December 1977, a drenta e tristo noticia cu Rufo Wever inesperadamente a fayece na edad di 60 aña.
Dialuna 2 di Januari 1978, Rufo a wordo hiba na su ultimo luga di sosiego, cual ta e santana Catolico na Oranjestad. Un entiero hopi grandi, hopi hendenan prominente di e tempo ey tabata presente. Gobernador di Antiyas di e tempo ey Sr. Leito, Waarnemend Gezaghebber Frans Wernet, Deputadonan Sr. Daniel Leo y Sr. Nel Oduber. Consehero General di Bestuurscollege di Aruba Sr. Betico Croes. Miembronan di Eilandsraad Sr. Jossy Croes y Sr. Watty Vos. Sr. Ebby Arends di Camara di Commercio. Sr. Hubert Booi di departamento di Cultura y tambe hopi di su amigonan den e mundo di musica, famia y conocirnan a compaña Rufo na su ultimo luga di sosiego. Trio Huasteca a toca den misa, na final Sr. Etty Toppenberg a canta solo, un cantica di despedida.
Entiero di Rufo Wever
Na Santana Rufo Wever su bon amigo Padu Lampe a hiba palabra bisando, cu Rufo no tabata solamente un bon musico pero un bon persona y cu Rufo tabata e estimulo den su bida como musico.
Gobernador di Antiiyas tambe a hiba palabra y a gradici Rufo pa tur locual e la aporta na e musica di antiyas. Sigui pa Daniel Leo & Betico Croes ambos a duna un discurso di despedida y a pone e enfasis riba e amor grandi cu Rufo tabata tin pa su isla, cu na edad di 15 aña caba, e la expresa e amor pa su isla den e cantica ” Aruba Dushi Tera”.
Rufo Wever den compania di Sr. Padu Lampe, Sr. Albert Eman di Voorlichtingsdienst hunto cu Deputado di Cultura Sr. Nelson Oduber. Rufo a regala e deputado di e tempo ey un disco, recientemente graba.
Rufo Wever a wordo dera na un forma hopi digno, dia 2 di januari den oranan di atardi Aruba a tuma despedida di un bon musico, bon persona y un bon compositor. Cu Rufo Wever sigui sosega na paz.
Galleria di algun potret cu a sali den media den pasado di Sr. Rufo Wever qepd.
