Tin un caminda largo ainda pa cana pa realisa e certificacion necesario
ORANJESTAD – Durante e tratamento di e Cuentanan Anual di Pais Aruba pa 2016, 2017 y 2018, Minister Maduro a splica Parlamento kico Gobierno ta haci pa por yega na un ‘goedgekeurde accountantsverklaring’ pa certifica e cifranan di Cuenta Anual di Pais Aruba. E mandatario a expresa cu e no ta un secreto cu e cifranan di Pais Aruba ainda no ta conta cu un certificacion den forma di un ‘goedgekeurde accountantsverklaring.’ Esaki ta un preocupacion cu Controlaria General tin algun aña ta señala y recientemente CAFT tambe a vocifera su preocupacion pa esaki. Gabinete Wever-Croes na su entrada den gobernacion a atende cu e preocupacion aki y a yega na palabracion cu CAFT pa traha na un manera serio pa por identifica den un ‘nulmeting’ cual ta e puntonan cu mester mehoracion y indica con por bay mehora e procesonan administrativo necesario pa por yega na un mihor control di e cifranan di Pais Aruba. Minister Maduro a informa cu e ‘nulmeting’ ta wordo haci awor pa Centrale Accountantsdienst CAD. Pareu cu esaki SOAB di Corsow tambe ta yudando CAD pa por yega na e proceso necesario cu e meta pa duna un declaracion special riba e cifranan di aña 2020. Minister Maduro a splica Parlamento cu pa yega na un ‘goedgekeurde accountantsverklaring’ lo dura algun aña. E resultado di e ‘nulmeting’ lo mester wordo ehecuta promer, pues drecha tur locual mester wordo drecha na diferente departamento, pa despues e accountant por certifica e cifranan presenta den e Cuenta Anual. Ta premira cu e declaracion special riba e cifranan di aña 2020 por ta cla den aña 2021 y den aña 2022 lo bay tin un declaracion special pa e cifranan di aña 2021. Pa awor aki e trabounan lo mester sigui pa asina kizas na aña 2023 Pais Aruba por conta cu un ‘goedgekeurde accountantsverklaring.’