Parlamentario di AVP drs. Mervin Wyatt-Ras: Enseñansa, ayudo efectivo y guia ta clave den eliminacion di pobresa y desigualdad

ORANJESTAD – Na final di e sesion mas reciente di brainstorming organisa pa Partido di Pueblo Arubano (AVP), Parlamentario drs. Mervin Wyatt-Ras a sali masha satisfecho cu e participacion y contribucion for di e stakeholders invita. “Esnan presente a duna un bon aporte paso nan a trece nan puntonan dilanti, y si en berdad bo kier elimina pobresa, si bo kier kibra e desigualdad, ta importante pa analisa tur loke nos ta haci. Paso tin hopi cos bon pa combati desigualdad den comunidad, pero mester fortifica nan.”
Tres punto resaltante di e anochi tabata e importancia di por conta cu un bon sistema di enseñansa, pa facilita e caminda cu e persona cu mester di yudansa mester cana pa yega na esaki, eliminando burocracia, y pa duna atencion special na hobennan cu ta bin di famianan den dificultad y di e manera aki kibra e circulo vicioso cu ta pasa di un generacion pa e siguiente. Den e ultimo punto aki, Wyatt-Ras ta considera importante pa enfoca riba informacion y conscientizacion atrabes di role models den comunidad cu hobennan por identifica nan mes cune.
Ta esencial pa tur cabes bini hunto; esey tabata e consenso entrega e diferente instancia cu ta ocupa nan mes cu diferente problematica. “Traha hunto, sincroniza y wak no solamente con gobierno tin pa haci cierto tarea, pero tambe traha riba e parti di sosten di comunidad mes; motiva boluntarismo. Tin tempo dificil, pero hende mester step in y yuda otro. Dor cu den nos comunidad a bira cu tur hende mester traha, te hasta esnan grandi di edad, tin falta di e sostey ey. Nos tin cu wak con por yuda otro.”
Wyatt-Ras ta indica cu tanto den gobierno, como for di Parlamento partido AVP a realisa esey. Ta consulta pueblo pa formula e puntonan di maneho y asina goberna. Varios stakeholder a trece dilanti cu mester wak kico ta biba den pueblo y puntranan con nan ta haya cu bo ta haciendo loke bo a priminti como vision di maneho y esey no ta pasando. E sesionnan aki di informacion caminda a toca diferente topico, por ehempel, cuido medico durante pandemia, tin hopi cos cu professionalnan ta pensa cu ta aporta na un vision. AVP a tuma esey y a bin cu un rapport.
E biaha aki a toca turno na sector social y atrobe lo trece un concljusion dilanti cu por usa mañan como punto di maneho. “Mi ta gradici tur cu a bin, sin importa cu ta un partido politico, sin importa cu a expone nan mes. Nan a bin duna nan contribucion y tanto di e diferente fundacion, pero tambe Departamento di Asunto Social (DAS), Pastor, otro iglesia, etc. Di curazon hopi danki. Nos ta bay pone esaki pa traha na disminui tur desigualdad cu tin den comunidad,” e Parlamentario a finalisa bisando.