Diamars merdia, Prome Minister Evelyn Wever-Croes hunto cu Minister di Finansa, Asunto Economico y Cultura, Xiomara Maduro y participacion di Minister di Husticia Andin Bikker, a tene un otro cumbre cu sindicatonan, gremionan comercial y partidonan politico en conexion cu e negosacionnan cu Hulanda pa loke ta trata Covid-19 manera cu Gobierno a bin ta haciendo desde cu a cuminsa negosia cu Hulanda na juni ultimo.
Prome Minister a habri e cumbre enfatisando e impacto grandi cu Covid tawata tin riba Aruba su finansa y economia. E mandatario principal di nos pais a enfatisa cu Gobierno di Aruba durante e negosacionnan cu Hulanda a purba tur opcion pa saca e miho deal pa Aruba y a yega na e punto cu mester acepta e deal cu Hulanda despues di e cambionan cu Gobierno a logra pa principalmente salbaguarda nos autonomia. Pero Aruba mester di ayudo pa sali mas fuerte y resiliente for di e situacion aki cu a wordo ocaciona door di Covid-19.
“E problemanan financiero cu Covid a causa e aña aki, pero tambe sigur e siguiente dos añanan, ta enorme. Realidad ta cu nos so no por sali for di e abismo cu Covid a crea, nos mester di ayudo. Den bida ta pasa cu hasta esnan mas independiente, esnan mas orguyoso, mester pidi ayudo cierto momento. Pidi ayudo no ta señal di debilidad, e ta señal di forsa, pasobra nos ta pidi e ayudo aki temporal, pa nos por sali mas fuerte di e crisis aki. Nos ta convenci cu e cambionan cu tin aworaki riba papel, lo yuda pa Aruba por sali hopi mas lihe for di e crisis aki. Nos lo haya asistencia, placa pa inversion, fiansa na 0 porciento y pa 2 aña largo refinanciamiento lo bay ta na 0 porciento. Algo cu Gobiernonan a purba pa hopi aña pero no a logra”, Prome Minister a duna di conoce.
Gabinete Wever-Croes a demostra cu por sanea un situacion financiero malo cu a encontra na principio di e gobernacion aki entregando prome cu Covid a dal, un presupuesto cu un surplus di 40 miyon Florin. Gabinete Wever-Croes por y a logra esaki den apenas dos aña di gobernacion. Y cu determinacion y sosten di pueblo, lo logra un biaha mas pone Aruba riba e bon rumbo financiero bek pa asina nos pueblo por sinti alivio cu nos merece.
Esnan cu a participa na e cumbre a haci hopi pregunta al respecto y ta mustra cu ta convivi cu desaroyo di nos pais. Gobierno di Aruba un biaha mas ta score cu transparencia haciendo e encuentro virtual aki via paginanan social di Gabinete Wever-Croes y TeleAruba pa asina pueblo henter por a sigui e informacionnan duna den e cumbre.
