Den 9 dia Prome Minister Evelyn Wever-Croes a haci locual cu ex minister Marisol Lopez-Tromp no kier a haci den 9 luna
Siman pasa Prome Minister Evelyn Wever-Croes a depolitisa e proceso di otorgamento di tereno, cu esaki el’a pasa e responsabilidad di e proceso den man di ehecutivonan di e departamento di DIP. Esaki a base di e 4-ogen principe, pues cu no ta un hende so ta firma, sino cu mas hende ta controla y firma pa cada otorgamento. Cu esaki Prome Minister a indica cu ta elimina metemento politico den e proceso di otorgamento di tereno.
“Nos a conoce minister den pasado cu tabata duna tereno solamente na esnan cu e tabata kier, of esnan cu tabata paga placa pa esaki. Nos a conoce minister tambe cu kier a controla tur cos pasobra e no tabata kier pa ningun hende cu por ta simpatisante di MEP of AVP haya, y pues kier a handpick nan su mes. Cu e decision aki di Prome Minister pa depolitisa otorgamento di tereno, e influencia politico ey ta finalisa.
Desaroyo economico ta depende di gran parti di tereno, y no por tranca esaki pa perhudica hende cu no a vota pa bo, ni tampoco por tranca esaki pa duna solamente na esnan cu kier paga placa pa nan”, ta declacion di Prome Minister siman pasa despues di a tuma e decision aki.
A tuma nota cu mesora despues ex minister Marisol Lopez-Tromp a duna un serie di reaccion, y kier a bagatelisa e decision di Prome Minister. Locual Marisol Lopez-Tromp no a splica ainda, ta dicon e mes no a depolitisa e proceso di otorgamento di tereno? Dicon den tur 9 lunanan cu e tabata minister, e no a haci locual Prome Minister a haci den apenas 9 dia cu el a asumi e encargo aki?
E contesta ta simple: pasobra Marisol Lopez-Tromp no tin e vision cu Prome Minister tin, ni e determinacion pa caba cu corupcion. Pasobra Marisol Lopez-Tromp no tabata tin e curashi cu Prome Minister si tabata tin. Bringa corupcion ta un prioridad di Prome Minister Evelyn Wever-Croes y Gabinete Wever-Croes, y pa bringa esaki bo mester tin vision, determinacion y curashi. Prueba di esaki ta con den 9 dia Prome Minister Evelyn Wever-Croes a haci locual cu ex minister Marisol Lopez-Tromp no kier a haci den 9 luna!