ORANJESTAD, Aruba – 1 di november, 2020:
Actualmente ta tumando luga e campaña anual di vacunacion contra Influenza organisa pa Departamento di Salud Publico.
¿Con e vacuna contra influenza ta traha?
Ora e vacuna wordo aplica, bo curpa ta traha anticurpa contra e virus y bo ta keda proteha pa un tempo di haya infeccion contra griep.
E vacuna tambe ta duna proteccion contra 4 tipo di influenza:
Tipo A/ H3N2 y H1N1
Tipo B/ Yamagata y Victoria.
E intencion di e vacuna ta pa preveni e malesa di griep na momento cu e curpa a keda contagia.
¿Ken no mester wordo vacuna?
Normalmente, tur persona por haya e vacuna aki, cu excepcion di:
-Mucha bou di 6 luna,
-Persona cu cancer,
-Persona cu ta haya qimioterapia,
-Persona cu problema di su sistema immunologico ,
-Persona cu ta alergico na webo, jello of algun tipo di antibiotica y
-Persona cu actualmente ta sinti malo di griep
Aki nos schedule di vacunacion pa e siman cu ta bin:
• Diamars, 3 di November: Centro di Bario Noord / 9am-12pm
• Dialuna, 2 y 9 di November: Centro di Bario Brazil / 9am-12pm
Si bo ta wordo considera pa bo Dokter di Cas como un persona cu ta cay den e grupo di riesgo, e vacuna lo ta gratis, cu e recept di bo Dokter di Cas compaña pa bo Zorgpas di AZV lo bo wordo vacuna na un di e localidadnan segun fecha y ora di bo cita. Adultonan mayor di 60 aña mester presenta solamente cu nan Zorgpas di AZV valido na nan cita.
Tur otro persona cu ta interesa pa wordo vacuna, pero no ta cay den e grupo di riesgo, por cumpra e vacuna cu ta solamente disponibel na seccion di Malesanan Infeccioso. Pa cumpra e vacuna mester haci un cita online via www.dvg.aw. Ariba e website lo encontra un link pa por traha un cita pa campaña di vacunacion contra influenza.
E vacuna no lo ta disponibel pa cumpra na e localidadnan di vacunacion. Solamente na Departamento di Salud Publico. E vacuna tin un costo di fl 20,- cu por wordo paga unicamente cu bo carchi di banco (swipe), no ta permiti pa paga cu placa cash.
Pa esnan cu no tin acceso na internet, por haci un cita telefonicamente yamando na 5224239 of 5224241. Nos ta prefera pa e proceso bay via un cita online, ya cu nos telefonnan ta constantemente ocupa relaciona cu e maneho di e crisis di Covid-19; si toch ta dicidi di yama, por fabor, tin pasenshi.
Departamento di Salud Publico tey pa bo, nos kier bo bon!
#VacunaContraInfluenza
#DVG