ORANJESTAD
Den cuadro di e campaña “Aruba ta Conta cu Bo” di Departamento di Salud Publico, un di e gruponan di nos comunidad cu nos kier presta mas atencion ta: NOS GRANDINAN.
E temporada di Covid-19 aki, sigur a impacta mundo henter y Aruba no a keda afo, pesey e situacion di nos adultonan mayor ta un di nos prioridadnan. Nan cuido, nan trankilidad y nan bienestar ta nos preocupacion.
Si abo ta forma parti di e segmento di nos poblacion cu tin 60 aña of mas, e informacion aki ta valioso pa bo. Como Departamento di Salud Publico, nos ta haci un yamado pa bo tuma control di bo salud.
Si bo ta sufri di cualkier malesa cronico manera sucu, presion y colesterol, nos ta urgi bo pa regula e malesa aki hunto cu bo Dokter di Cas y tuma bo remedinan segun instruccion di e dokter.
Pa bo “boost bo defensa”, come alimento saludabel y bebe hopi likido. Haci actividad fisico, minimo 30 minuut pa dia. Reduci consumo di alcohol y humamento.
Pa loke ta referi socialisa, haci esaki cu precaucion, mirando e situacion actual di e pandemia. Mantene distancia di 1.5M na tur actividad social, ya sea religioso of cultural. Bisti bo tapa boca ora bo ta den contacto cu famia, conocirnan y ora bo drenta un luga cera. Cuminda cu expresion bunita ariba bo cara, ya cu no por tin contacto fisico, laga bo wowo papia pa bo!
Nos recomendacion pa sigui desaroya bo actividadnan diario, ta pa haci respondi manera compras of bay botica, parti mainta. Si bo ta cuida nieto, sea alerta pa sintoma di Covid-19.
Tin un grupo di riesgo cu mester tuma tur e accionnan mas riguroso, e grupo di riesgo ta encera:
Adulto 70+.
Esnan cu problema di pulmon y via respiratorio no regula.
Persona cu malesa cronico di curason bou tratamento.
Individuo cu diabetes cu no ta regula of ta mal regula, y ta presenta complicacionnan secundario.
Esnan cu malesa grave di higra y cu obesidad (sobrepeso extremo).
Tambe tur esnan cu problema di riñon cu ta dialisando of warda transplante; y finalmente, individuonan cu sistema inmunologico abou debi na: malesa auto-inmune cu medicacion, transplante di organo of stamcell, malesa hematologico, asplenia y otro malesanan cu ta ataca e sistema inmunologico, manera HIV no trata of HIV cu valor di CD-4 <200mm3. Pashent di cancer cu ta hayando chemotherapie y/of bestraling.
Aruba ta un pais bendiciona, patriotico y balente, nos tur mester ta cla pa defend’e y e positivismo mantene. Pa nos sigui bringa e Covid-19, mester sigui tur regla y recomendacion stipula. Nos tur mester ta determina pa tur reto enfrenta. Ban sigui cuida!
#ArubaTaContaCuBo
#DVGAruba