NASA: ‘Tin awa ariba luna’

WASHINGTON – Investigadornan ta bisa di a haya prueba cu ta demostra cu tin mas awa ariba luna cu nan tawata pensa anteriormente. Cu e SOFIA-telescoop, NASA a logra determina e presencia di moleculanan H2O y ta papia di un avance sumamente grandi. E descubrimento aki a wordo haci publico dialuna pasa.
E revista Nature Astronomy, den cual resultadonan di investigacion di espacio ta wordo publica, a tene dialuna pasa un conferencia di prensa grandi pa anuncia esaki. Cu tin awa ariba luna tawata un indicacion cu tawata wordo investiga pa hopi tempo caba. Pero e instrumentonan, te cu rencientemente, no por a logra capta esaki. Esaki a logra cu e SOFIA-telescoop, un telescoop monta ariba un Boeing 747.
Investigadornan ta kere cu e awa ta hinca den glas cu a wordo produci door di impacto di piedranan espacial of como un capa fini di molecula, segun Nieuwsblad. Ainda lo mester sali na cla, si e awa aki lo por wordo saca y uza.
NASA a establece cu tambe tin awa na lugarnan na unda luz di solo ta yega. Banda di esey, tin ijs den e asina yama ’cold traps’, partinan friu den sombra ariba luna. Algun di e partinan ey ta solamente 1 meter grandi pero ariba luna tin asina tanto di e partinan ey, cu mas o menos 20 porciento di tur e ijs ariba luna lo por wordo haya eynan.
Cu tin awa ariba luna ariba su mes no ta algo nobo. Den e piedranan lunar cu a wordo treci for di e misionnan di Apollo hopi aña pasa, a wordo haya rastro di awa. Y dos aña pasa a wordo confirma locual pa añas tawata wordo sospecha, cu den e partinan scur y kraternan na cierto parti di luna, tin awa den forma di ijs.
Fuente: De Telegraaf