Hulanda: Personanan interna den Intensive Care a subi cu 50% den 1 siman di tempo

AMSTERDAM – E cantidad di contagio di coronavirus a subi barbaramente na Hulanda y Europa. Mas y mas lugarnan unda hendenan ta gusta bai cu vakantie ta wordo denomina como ‘oranje’. Na ful Europa medidanan ta wordo tuma, manera lockdown completo, toque de queda y restriccion di contacto.
Hospitalnan ta haya nan cada bes mas bou di presion door di e aumento di e cantidad di paciente contagia cu coronavirus. En total e hospitalnan Hulandes ta tratando 1943 paciente. Esaki ta 84 mas cu diamars pasa, segun Landelijk Coördinatiecentrum Patiënten Spreiding (LCPS).
Ariba intensive care tin actualmente 450 paciente cu coronavirus, un aumento di 31 compara cu diamars pasa. Mayoria hende cu Covid-19 ta drumi ariba un verpleegafdeling di hospital.
Den e ultimo 24 ora, 27 paciente mester a wordo manda pa hospitalnan den otro regionnan. Na ciudadnan manera Amsterdam, Rotterdam, Den Haag y Leiden tin hopi paciente di coronavirus den hospital.
„E cantidad di paciente di Covid ta keda subi. Esaki ta bin door di e subida continuo di e cantidad di contagio. Den averahe e cantidad di persona interna den intensive care ta subiendo den comparacion, hopi mas lihe cu e cantidad di persona interna ariba afdeling di hospital. E ultimo 7 dianan, e cantidad di persona interna den intensive care a crece cu 50% y e cantidad di persona interna ariba afdeling a crece cu 27 porciento”, segun Ernst Kuipers, presidente di Landelijk Netwerk Acute Zorg.