Mientras cu scientificonan rond di mundo ta den un careda pa haya un tratamento pa coronavirus, Anika Chebrolu, un mucha muher di apenas 14 aña di Frisco, Texas, Estados Unidos, a caba di gana e 3M Young Scientist Challenge – y un premio di 25,000 dollar – pa un descubrimento cu por hiba na un terapia potencial pa combati Covid-19.
Anika’s su invencion ta haci uzo di un methodo ‘in-silico’ pa descubri un molecula cu selectivamente por pega na e ‘spike protein’ di e virus SARS-CoV-2.
“E ultimo dos dianan mi a wak cu tin hopi atencion di medionan di comunicacion pa mi projecto, mirando cu ta trata di e SARS-CoV-2 virus y e ta refleha e speranza colectivo pa pone fin na e pandemia aki. Ami, mescos cu tur otro hende, ta spera di por regresa pronto na bida normal.” Anika a bisa CNN.
Coronavirus a mata mas di 1.1 miyon di hende rond di mundo desde cu China a raporta su prome caso na World Health Organization (WHO) na December 2019. Estados Unidos a conoce mas di 219.000 morto, segun e data di Johns Hopkins University Center for Systems Science and Engineering.
Anika, kende ta un Americano di origen Hindu, a entrega su projecto tempo e tawata den 8ste klas, pero e intencion na e momento ey no tawata pa haya un cura pa Covid-19. Inicialmente, su meta tawata pa uza methodonan ‘in-silico’ pa identifica un componende cu por pega na un proteina di e virus di influenza.
“Despues di a tuma asina hopi tempo investigando pandemianan, virusnan y descubriendo diferente medicinanan, tawata increibel pa pensa cu mi mes lo a biba algo asina,” Anika a bisa.
“Mirando e severidad di e pandemia di Covid-19 y e impacto drastico cu e tawata tin ariba mundo den un tempo asina cortico, mi a dicidi, cu ayudo di mi metor, di cambia e direccion di mi projecto y enfoca ariba e virus di SARS-CoV-2.”
Anika a bisa cu ela haya inspiracion pa desaroya un cura potencial despues di a siña tocante e pandemia di griep di aña 1918 y analiza cuanto hende ta muri di griep tur aña na Estados Unidos a pesar di vacunacion annual y tur e remedinan anti-fluenza cu tin ariba mercado.
“Anika tin un mente inquisitivo, y ta uza su curiosidad pa haci pregunta tocante un vacuna pa Covid-19,” Dr. Cindy Moss, un di e hueznan di e 3M Young Scientist Challenge, a bisa CNN. “Su disponibilidad pa uza su tempo y talento pa haci di mundo un lugar miho, ta duna nos tur speranza.”
Anika a bisa cu e hecho di a gana e premio y titulo di top young scientist ta un honor, pero su trabou no a caba aki. Su siguiente meta ta pa traha hunto cu scientificonan y investigadornan cu ta bringando pa domina e mortalidad di e pandemia door di desaroya su descubrimento den forma di un cura pa e virus. “Con mi lo desaroya e molecula aki mas leu cu e ayudo di virologonan y specialistanan den farmacologia, lo determina e exito di mi esfuerzonan.”
Fuente: CNN
