Parlamentario di fraccion di AVP, Benny Sevinger a mustra diamars ultimo cu pueblo di Aruba tin un gobierno desfuncional, caminda ningun hende ta confia otro, gran cantidad ta kere cu coleganan di coalicion ta corupto y den Parlamento ta un comedia-drama politico tras di otro.
Sevinger a trece varios situacion dilanti cu a pasa den ultimo siman- y lunanan caminda simplemente pueblo no sa mas kico e tin na un gobierno cu nan mes ta acusa otro di actonan di corupcion.
“Señora Marisol Lopez Tromp a bin den Parlamento y a tilda Ministernan di corupcion, su coleganan!
Nos a tende cu el a entrega denuncia contra di Minister Dangui Oduber, nos a tende cu el a entrega denuncia contra di Minister Andin Bikker pa e problema di celnan, caminda nos por a mira documentonan cu esakinan a bay bou di man, nos no sa si el a entrega denuncia riba e helikopter cu a bay den mesun forma.
Pero por mira un Minister ta drenta den Conseho di Minister, ta investiga cu propio colega cu tabata prome cu’ne como Minister di Infrastructura, sr Otmar Oduber anto ta tilda su coleganan actual di ta corupto y a bay entrega denuncia, supuestamente na Landsrecherceh.
Sinembargo Marisol ta keto bay eynan y splica pueblo e ora, con bo por ta den un grupo di corupto y aki ta unico conclusion cu mi por saca, ta cu bo ta mescos cu nan, of no?
Con mi por ta meti mey mey di e grupo aki caminda mi a entrega denuncia contra nan?
E no tin sosten di ningun parlamentario cu ta sostene e actual gobierno, pero keto bay e tey y aki no por bisa cu e tey pa traha den nomber di pueblo aki.
No, bo tey pasobra bo tambe tin cosnan pa fix y esey ta uno, ya con bo por splica comunidad aki, c’un Minister di Husticia ta meti den dunamento di contractnan ‘onderhands’ sin destaho publico, sin cu tin consehonan positivo di e dienstnan, al contrario ta conseho negativo nan a duna riba esakinan y a otorga esakinan tog.
Nos ta hende riba huurmento di edificionan pa Landsrecherche, pa Polis etc, dunamento di contract pa traha celnan, helikopter etc.
Ora cu mira kico Minister Glenbert Croes ta haciendo, manera por a scucha un persona recorda Glenbert cu si e ta corda tempo cu nan tabata core caya, bo ta corda e cosnan cu nos tabata haci, un observacion cu ta duna Ricardo Croes rason.
Sigur ora cu el a para siman pasa dilanti Parlamento y declara na prensa cu su persona no ta e Minister cu tin nanishi yen di puiro blanco, cu e no ta e minister- y parlamentarionan cu ta meti den hibamento di droga etc.
Ricardo no a menciona nomber pero el a referi na su coleganan di gobierno y parlamento y ora ta lanta e pregunta con por ta den un gobierno, sostene un gobierno, cu abo ta bisa cu nan no ta transparente, cu Minister Presidente ta un gañado, kende a cana tur caminda rond Aruba gaña pueblo pa vota p’e, Ricardo Croes su palabranan, pero bo ta sostene e gobierno aki keto bay!
Con por splica e pueblo aki, abo Ricardo Croes, kende tin un solo agenda ora cu a forma gobierno cu ta di legalisa marihuana, anto no medicinal y asina descriminalisa e proceso aki caminda por usa y huma unda bo kier y kende cu ta por plant’e.
Ricardo a entrega tres mocion, ultimo durante di e ley di screening siman pasa, Ricardo a entrega un amienda y cuater biaha nan a vota contra bo amienda, contra bo mocionnan.
Kico por ta e motibo e ora pa Ricardo sostene gobierno? Simplemente mi ta bay bek na loke mi a bin ta bisa tres aña pasa, cu Aruba tin un gobierno di un grupo di bandido cu tin como meta di horta e banco cu ta e pueblo di Aruba.
Ora cu scucha señora Glenbert Croes ta nombra tur su rumannan rond di dje, un pa puiro, un pa saca potret, un pa carga su tas, anto ta bisa pueblo pa bin cerca dje, ya cu e lo atende tur hende, lo regla tur cos pa tur hende, politicamente e kier haci uso di placa di pueblo cu pueblo tin derecho riba dje, pa core campaña cu FASE, cu loonsubsidie y otro cosnan.
Y ora pueblo yega cerca Glenbert Croes, e ta manda e hendenan cerca su ruman y ora cu sucha y lesa cu Parlamentario Endy Croes, un sinberguensa grandi, bisa hendenan cu bay chek nan Fase ya cu el a regla esakinan pa nan, cu el a regla 300 florin di Fase pa core bay busca esaki, ta kico e tin di regla?
Esaki ta e gobierno desfuncional cu Aruba tin caminda parlamento no ta confia gobierno y gobierno mes no ta confia su mes, un Ministerraad caminda ta acusa otro di corupcion, tur ta entrega keho contra otro pero nan ta keto bay pega eynan.
Esaki ta e realidad cu pueblo ta mira tur dia,” Parlamentario Benny Sevinger a declara durante conferencia di prensa.