Oranjestad – Pa mas cu 30 aña, Condé Nast Traveler’s Readers’ Choice Awards ta produci listanan cu e consumidor por confia, cual ta menciona e miho hotel, resort, ciudad, isla, aerolinea y lineanan di crucero pa cu destinacionnan di vacacion. Nan ta pidi opinion di e bishitantenan pa comparti nan experiencia cu nan famia y conocirnan etc.
Aruba Tourism Authority ta contento di comparti cu nos isla a wordo nomina den diferente categoria pa e conocido Conde Nast Traveler 2020. Aruba a gana pa e Readers’ Choice Award den dos categoria, cual tur tin di haber cu nos turismo.
Nan ta: ‘The Best Islands in the World’ na unda Aruba a sali riba e di 4 luga den e top 5 di Caribbean & Atlantic unda Conde Nast Traveler a nota cu Aruba ta den e top pa loke ta e beachnan den e region di Caribe y cu Aruba tin vuelonan sea non-stop of cu un stop for di diferente luganan na Merca. Ademas nan ta menciona e variedad di acomodacionnan cu nos isla ta ofrece.
E otro islanan menciona den e top 5 tawata:
1: St. Barts
2: St. Vincent and the Grenadines
3: Anguilla
5: Puerto Rico
Tambe Aruba a wordo menciona den e top 40 resortnan pa e islanan den Caribe na unda Bucuti & Tara Beach Resort a sali riba number 17 y Aruba Marriott Resort & Stellaris Casino a sali riba number 35.
E resultadonan di Conde Nast Traveler a wordo publica e siman aki den nan edicion online pa October 2020.
Aruba Tourism Authority ta honra cu e reconocimentonan internacional aki y ta felicita y ta pidi tur esnan directo of indirectamente laborando den e industria di turismo pa sigui enfoca riba nos metanan comun, incluyendo tur locual mester haci pa sigura un experiencia vacacional di calidad meymey di e pandemia. Alabes A.T.A. ta felicita tur socio pa cu e premiacion aki y tambe ta felicita Bucuti & Tara Beach Resort y Aruba Marriott Resort & Stellaris Casino y gradici nan y tur pa nan esfuerso cu ta contribui na engrandece nos destinacion.
