Dialuna 5 oktober 2020, den un reunion publico, a trata e ley integridad di ministernan y candidato-ministernan.
E ley di iniciativa a bin ta canando un proceso largo, desde aña 2015. E ley a wordo aproba na mei 2017, sin sosten di Partido MEP, pa medio cu e ley no tabata cuadra cu criterionan e tempo ey. Ta di remarca cu e ley proponi na 2017 no tabata tin e aprobacion di Raad van Advies, mirando cu Raad van Advies a señala den e conseho cu mester cambia varios punto como cu nan no ta cuadra cu normanan, regla y leynan. Esaki ta e motibo principal dicon gobernador no por a confirma e validez y a ratifica esaki.
Ley di iniciativa nobo
Coleganan di fraccion di MEP Edgard Vrolijk y Rocco Tjon a tuma e iniciativa pa traha riba e ley aki, tumando tur e consehonan y puntonan di Raad van Advies hopi na serio. A agrega e consehonan y cambionan aki den e ley pa fortifica integridad y bon gobernacion na Aruba, cual tambe ta un di e puntonan di salida di Programa di Gobernacion 2017-2021 ‘Hunto Pa Aruba’ di Gabinete Wever-Croes y alabes un principio hopi importante pa partido MEP.
Screening di minister y candidato-minister den funcion
E concepto di e ley di iniciativa di coleganan Edgard Vrolijk y Rocco Tjon ta reglamenta entre otro e screening di ministernan y candidato-ministernan cu lo bai asumi e funcion aki den siguiente gobernacion. Un biaha pa aña e minister den funcion mester entrega escrito si a bin algun cambio den su bida/pertenencianan. Esaki ta un muestra cu e ley aki ta pone enfasis riba transparencia continuo di un minister. Cu e declaracion por escrito aki, e minister ta conciente cu tin bista riba dje y cu e mester sigui traha den un manera corecto.
E ley aki ta stipula tambe un procedura amplio cu participacion di varios persona pa duna rapport di consehonan na e formador di e gobierno. Di e forma aki ta hasi e proceso mas transparente posibel, paso e formador ta bira hopi mas limita na su libertad di evaluacion di un candidato-minister.
Confiansa den nos comunidad
E ley di iniciativa presenta ayera pa coleganan di fraccion di MEP sigur lo duna mas trankilidad na nos pueblo. Paso e pueblo lo sinti nan cu mas confiansa ora ta pone personanan na mando pa asina dirigi nos pais. Door di e proceso den e ley nos por mira cu e personanan ta responsabel y husto cu ta traha pa hiba Aruba dilanti y no mester solamente asumi di e bon intencion di e gobernantenan.
Conclusion
Ta di lamenta cu e ley aki no a wordo aproba den Parlamento. Fraccion di MEP ta para pa integridad y transparencia y door di aprobacion di e ley di iniciativa aki nos por a habri un caminda pa e palabra cu ta wordo usa hopi ultimamente, ‘politica nobo’ cu lo sigura cu futuro gobernantenan lo mester keda integro den nan funcion y alabes garantisa bon gobernacion. Mi ta spera cu pa e proximo reunion pa trata e ley aki, e lo por wordo aproba.
