Bloemond – Dialuna anochi pa mas o menos 7:30 polis y unidadnan di rescate di Brandweer a sali direccion Bloemond, unda un accidente serio a sosode ora cu un auto a bolter.
Informacionnan adicional tawata bisa cu e vehiculo te hasta lo a pega of tawata na candela. Esaki a pone cu tur unidad di rescate entre nan Polis a pura pa yega e sitio.
Na yegada nan a topa cu un auto cu no tawata na candela y un chauffeur ariba tera benta, no ta conoci si su mes a sali of a wordo saca door di e auto.
E vehiculo cu a bolter lo tawata bayendo ariba e caminda di Bloemond cu velocidad super halto y esaki mes a causa cu e la perde control y dal un otro auto.
Wayanan di coriente a keda colga na un manera masha peligroso mes y esaki a haci cu autoridad tawata tene hendenan ariba un distancia.
Na yegada di unidadnan di rescate manera Bomberonan nan no tawata tin ningun candela pa paga manera a wordo bisa. Por a mira bomberonan yudando e Paramediconan prepara e victima pa despues pone den ambulance y sali direccion Hospital.
Na e sitio a presenta specialista di trafico, bfto y tambe slachtofferhulp.
Departamento di trafico a conduci un investigacion bastante extenso cu a termina den careda di 10’or pasa di anochi.
Mientrastanto Elmar si tawata tin un trabou grandi pa lanta e palo e luz unda tawata tin un transformer grandi ariba. Algun parti den Paradera a keda sin coriente pa oranan largo.
