Den curso di siman pasa gobierno POREDmep a anuncia nombracion di un Alto Comisario nobo pa nos Cuerpo Policial. A bira obvio cu e pandemia ta wordo malusa pa hustifica un maneho basa riba incumplimento di e reglanan di Bon Gobernacion y di Integridad. Y tambe a bira obvio cu no tin intencion pa haci cambionan den e forma cu ta goberna nos pais. Di boca pafor ta profesa practica democratico, pero por vislumbra caba cierto tendencia di dictadura, manera expresa door di nos Prome Minister: si bo no kier yuda keda leu.
Gobierno sin ningun tipo di berguenza ta djis anuncia cu ta nombra un persona paso otronan (inner circle?) cu nan a puntra ta haya e persona “geschikt”!! Asina ta referi na e.o. ex-comisarionan di polis y ex-mandatarionan di Husticia. Cu nos sa ta 4 ex-mandatario di Husticia ta na bida, 2 di AVP y 2 di MEP. Dicon pa transparencia no ta bisa kende ta esnan cu a wordo pidi pa conseho? Tin algun ex-Comisario di Polis tambe, di cual 2 tabata bou di gobierno actual y a crea of lo mester crea funcionnan pa nan. Di e manera aki ta pagando 3 salario di Alto Comisario!
Kiko tabata e criterionan? Dicon no a bay pa un solicitud habri? Dicon asina liher? Kizas tabata tin un miedo cu lo por tabata tin otro hendenan den Cuerpo di Polis cu lo tabata tin mihó cualificacionnan?
No ta intencion pa bay huzga capacidad di e persona cu a wordo nombra, pero loke si nos ta cuestiona ta e FORMA cu e nombracion a tuma lugar. Nos ta sigur cu e persona tambe tin su meritonan. Pero pa UPP nos atrobe ta constata cu ta nombra un persona CONTRA reglanan di Bon Gobernacion. Un posicion asina clave y vulnerabal (loke na Hulandes ta wordo yama “vitale en kwetsbare functie”) nunca por ta parti di patronahe politico. Cu ki tipo di autoridad e gobierno lo por bay exigi di nos pueblo pa cumpli cu reglanan tanto skirbi como reglanan etico, si hamas e gobierno mes ta haya necesario pa actua di un forma honesto y integro. E nombracion contra tur regla di Bon Gobernacion y di Integridad lo por tin repercusion pa e posicion di un Korpschef, paso entre otro su mesun personal lo por usa e forma cu e nombracion a tuma lugar pa exigi e mesun trato, esta nombracion sin un solicitud habri y “bevordering” sin cu ta cumpli cu tur rekisito. P’esey UPP ta di opinion cu un persona cu ta respeta ley y cu ta kere den Integridad MESTER gradici pa e posicion ey.
Tambe nos ta puntra nos mes, con gobierno y minister Bikker ta bay splica gobierno Hulandes, cu hustamente loke nan kier di nos gobierno, esta bon gobernacion, cu ta trata aki di un nombracion cu a pasa dor di tur proceduranan normal, democratico y transparente? No ta nos mes ta duna gobierno Hulandes, y esnan cu na e momentonan aki ta apoya binimento di e “musketiers”, mas cuminda pa por sigui exigi y exigi partinan di nos autonomia?
Ta interesante pa sa kico a pasa cu e comisario di polis anterior. Ela bay di acuerdo cu e forma cu ela wordo hala un banda? Cu e nombracion aki, ta cuanto hende ta sinta na cas ta cobra e salario di Korpschef? Kico ta bay pasa cu mayan p.e. bin un gobierno di signatura berde? Lo bolbe cambia e korpschef y nos lo bay haya mas hende cu ta cobra un salario di korpschef?
Asina aki ta parce cu e fiesta di gasta placa di pueblo ta sigui sin misericordia y net e punto aki ta loke tabata un di e motibonan principal pakico Hulanda kier interveni. Gobierno ta trata todo por todo pa evita di reduci gasto di personal y principalmente e gasto adicional di coordinadornan cu ta keda haya tur sorto di “toelage” banda di un salario fenomenal. Pakico no ta corta den e gastonan aki?
Den crisis sin precedente aki tin hende ta bira manera un “rocket-promotion” y ta wordo beneficia cu entre otro promocion paso segun e propio comunicado di prensa di gobierno e “inner circle” di e minister a duna nan sosten! Ta kende mas por conta cu un “COVID-19 SPECIAL” asina? Atrobe un “happy few” den e “friends & family gang”? Y esaki no ta di e prome, sino nos por a wak esaki sosode na varios departamentonan cu ta cay bou minister di Husticia mes, minister di Enseñanza, Minister di Labor, di Transporte y ken sa na unda mas.