Presupuesto ta cubri FASE y MKB, y cu prestamo di Hulanda ta paga Subsidio di Salario
ORANJESTAD – Durante e Encuentro Publico siman pasa diahuebs na Parlamento, Minister Maduro a brinda informacion riba e sosten financiero cu Gobierno ta ofrece pa por surpasa e crisis di COVID19 y su efectonan economico cu e ta trece cune. E mandatario a comenta cu ultimo tempo a bin un discusion den comunidad di unda e fondonan ta bin pa Gobierno brinda e yudansa financiero den e crisis aki y ta wordo sugeri cu ta fo’i Hulanda ta fia placa pa paga tur yudansa, pero esaki no ta asina.
FASE, MKB y Subsidio di Salario
Minister Maduro a splica Parlamento cu FASE y sosten financiero na negoshi chikito y mediano (MKB), e 4000 florin pa kwartaal, ta wordo paga fo’i presupuesto di Aruba cu yudansa di tur hende cu a mustra solidaridad den rebaho di salario. E fondonan pa paga Subsidio di Salario, ta bin fo’i e prestamonan cu ta haci cu Hulanda. Como cu Gobierno ainda no a keda cla cu e deliberacion cu Hulanda riba e condicionnan pa por haya e prestamo pa cubri gastonan di juli, augustus y september, den e lunanan aki ta Gobierno di Aruba mes a paga e yudansa financiero den forma di Subsidio di Salario.
Inversion pa reactiva economia
Minister Maduro a informa cu den e splicacion riba e segundo cambio di Presupuesto 2020 riba pagina 8, por lesa di unda cada sosten financiero ta wordo paga. Tambe por mira cu e inversionnan pa reactiva economia lo wordo paga cu fiansanan haci riba mercado local. Pa e ultimo aki mester keda evalua cual lo por tuma lugar ainda e aña aki. E mandatario a indica cu mas detaye lo sigui ora cu Parlamento trata e segundo cambio di Presupuesto 2020.
