ORANJESTAD – Awe mainta Corte di Husticia di Aruba a dicta sentencia den e caso penal cu Ministerio Publico a cuminsa contra e homber J.G.M. Aruba Native por a compronde cu e homber J.G.M. a wordo haya culpable di a secuestra su ex amiga N., menaza e dama N. cu arma pa haya placa. Algun siman pasa durante tratamento di e caso, Fiscal a exigi 5 aña di prison. Hues no a sigui Fiscal y a baha e castigo.
Ultimo lunanan Corte di Husticia a tuma medida di prevencion pa cu e Covid 19. E casonan di presonan sera na KIA ta wordo trata via video conference, caminda e preso ta bay den un oficina na KIA mientras cu na edificio di Corte, Hues, abogado y Fiscal ta presente.
Hues a bisa J.G.M. cu e ta haya legalmente proba cu ariba e anochi di 3 pa 4 November 2019, J.G.M. a secuestra su ex amiga N. y a menaza cu arma y forza N. y famia di N. pa duna placa. Hues a bisa cu famia cu a wordo yama door di N., a mira J.G.M. cu arma den man y a exigi 30 mil dollar. E famia a yama Polis den oranan di marduga pa haci denuncia y Arestatie Team a actua caminda a dente J.G.M. y a haya e arma.
Ta asina cu e acusado J.G.M. ta bisa cu e no ta corda nada. Su abogado ta haya cu no por pone J.G.M. responsabel. Hues no a sigui punto di bista di abogado. Hues a sigui punto di bista di psychiater kende ta mustra cu ta imposibel cu J.G.M. ta corda kico el a haci dos dia promer y no ta corda nada kico el a haci riba e anochi di 3 pa 4 di November 2019. Psychiater ta haya cu J.G.M. ta gaña Psychiater ta mustra cu den e periodo di e incidente, J.G.M. tabata hopi depresivo y hopi emocional. Esaki ta mustra cu e ta culpable y ta responsabel pa loke el a haci. Psychiater no ta haya cu J.G.M. ta sufri di problema mental.
Hues a bisa J.G.M. cu loke el a haci ta delitonan hopi serio. Por a mira con J.G.M. via video call a menaza N. cu e arma pa haya placa. N. den su demanda di daño, a mustra cu ainda e tin molester di loke J.G.M. a haci. Na opinion di Hues, esaki ta comprendibel pasobra loke J.G.M. a haci, a afecta N. y a sacudi henter comunidad.
Hues a bisa cu pa cu e castigo, e ta tene cuenta cu J.G.M. no tin carchi di castigo. Tambe Hues ta tene cuenta cu segun investigacion di expertonan cu tabatin un relacion toxico caminda tabatin jaloersi di ambos banda.
Hues a condena J.G.M. na 3 aña di prison di cual 6 luna ta condicional cu un tempo di prueba di 2 aña. Hues a stipula condicional special cu J.G.M. ta cay den e tempo di prueba bou guia di Reclasering y cu J.G.M. ta prohibi di tuma contacto cu N. Tambe Hues a aproba e demanda di daño di N. y a stipula di medida di pago. Esey ta nifica cu si J.G.M. no paga, e lo bay sera.