Ayera, 25 di augustus 2020, tabata un dia historico na unda cu e organisacion mundial, “World Health Organization” (WHO) a declara cu e continente di Africa ta liber di e malesa polio. E ultimo pais di e continente di Africa cu a conoce caso di polio tabata Nigeria na 2016. Desde 2016 no a conoce caso mas di polio na Africa. Esey tabata e condicion pakico WHO a dicidi di declara e continente di Africa liber di polio ayera
.
Rotary Club Aruba ta forma parti tambe di e organisacion mundial, Rotary International. Pa e motibo aki Rotary Club Aruba kier a tuma e espacio pa subraya e importancia di e momento historico aki. Aunke na Aruba nos no conoce caso mas di polio door di e vacuna cu muchanan ta ricibi, Rotary Club Aruba tur aña ta forma parti di e initiativa di Rotary International pa medio di conscientisacion y tambe aportando cu fondo monetario na e initiativa mundial aki door di organisa e End Polio Now Fun Walk/Run.
Na aña 1988 Rotary International a cuminsa cu e initiativa “Global Polio Eradication Initiative” cu e meta pa elimina e malesa di polio na mundo na unda miyones di muchanan rond mundo ta ricibi e vacuna aki.
E trayectoria di continente di Africa no tabata uno facil, na 1996 ainda tabata conoce mas di 75.000 caso di polio tur aña. Nelson Mandela a dicidi di aserca Rotary International na 1996 pa asina forma un aliansa pa intensifica trabao nan pa elimina polio na henter e continente. Asina aki e initiativa “Kick Polio out of Africa” a cuminsa y awor 24 aña despues continente di Africa enberbad ta liber di polio.
Desde 1988 e casonan di polio rond mundo a baha drasticamente. Te cu awe e unico 2 paisnan cu ainda tin caso di polio ta Pakistan y Afghanistan. E momento historico di ayera ta un motivacion pa Rotary International hunto cu su diferente partners, na unda nos ta keda kere den e meta cu un dia lo elimina polio na mundo por completo.
