Bo salud y di bo famia ta den bo man, No neglish’e, ten’e bo mes na reglanan stipula pa Gobierno di Aruba
Oranjestad – Den pueblo tin confusion cu kiko si por y no por relaciona cu e Pandemia, cu tin Mundo completo den su gara.
Na cuminsamento di e second wave gobierno a actua mesora, ariba un anochi, riba short notice a cera barnan y nightclubs(nightlife).
Debi cu ta akinan ta unda e segundo brote hopi agresivo a start.
Mesora a cuminsa cu testnan na gran escala y tur dia nos por a keda mira con e indice di personanan infecta cu Covid-19 a crece na un velocidad alarmante.
Ciudadanonan a cuminsa bira malo, tin cu a drenta ICU otro a wordo isola y un cantidad di persona interna den Dr. Horacio E.Oduber Hospital.
Samenscholing verbod a drenta na vigor y hunto cu ne mas regla, pa asina trata di contene e Virus di sigui plama na un velocidad halto.
Pa un siman por a mira cayanan keto durante oranan di anochi, mientras cu den dianan testnan tawata wordo haci y filanan di auto e dianan debi cu tawata haci testnan via e sistema di Drive Thru.
A presenta algun “fout” y a stop, cu e sistema di test via Drive Thru.
Segun e dianan tabata bayendo e pueblo a cuminsa manera baha su guard, aunke mayoria di hende ta cana cu nan mask bisti ora di drenta un negoshi, establecimento of oficinanan.
Pero, di otro banda nos ta mirando un aumento bek den aglomeracion di hende y esaki ta visibel na diferente establecimiento. Algun luga ta habri y no ta tene nan mes ni na e regla cu 11’or mester cera. Polis mester controla casi tur anochi cua luga ainda ta habri sin conta e samenscholing paden.
E parti confuso di cua luga si of cua luga no por ta habri ta bin awor.
A cera unda e brote a cuminsa cu ta den e Hotzone, nos tur conoce e sitio, evitando cu hopi hende lo ta pega ariba otro cual ta logico y hopi bon di parti Gobierno.
Gobierno y su Crisisteam ta haciendo nan maximo esfuerso via medionan social pa consientiza e pueblo di con serio e situacion ta.
Pero asina mes, weekend pasa na varios establecimiento tabata tin aglomeracionnan grandi di cliente. Tin cu ta den aire liber, pero pega ariba otro y tin cu ta den luganan cera cu airconditioning. Fiesta di famia ta prohib, pero un establecimiento yena cu hende ariba otro si ta permiti ? Si no bin un reglamento por spera cu e cifra lo keda subi y Dios so sa si Hospitaal por bay carga personanan cu bira malo.
Nos ta puntra nos mes unda e sentido comun di e personanan aki ta cu ta expone nan mes y nan famia di participa den un aglomeracion di hende, sea paden of pafo di un establecimiento, cera of den airco.
Loke por a mira ariba weekend solamente lo por empeora e situacion actual. Gobierno ta haci su parti, pero abo como ciudadano mester usa common sense y no expone bo mes just pa un rato di placer, cu lo por costa bo bida of di bo sernan stima.
Riba e foto por a mira un di e lugarnan nocturno cu ta “bar/Restaurant” cu mag di ta habri paso e ta bende cuminda, pero su parkinglot y rond di e parkinglot tabata yen di auto staciona, sigur mas cu 50 auto. Un establecimento cu no ta hopi grandi y sigur no por carga mas cu 50 hende teniendo distanciamento social di 1.5 pa 2 meter for di otro. For di pafo caba por a mira con yen e luga aki tabata. Tambe por a mira na varios cas cu e habitantenan toch tabata haci fiesta y na algun di nan por a te hasta scucha musica duro.
Diasabra anochi manera ta custumber di tur weekend, un biaha mas, polis mester a bay hala atencion di esnan cu ta aglomera na Eagle Beach, polis mester pasa bisanan cu tin un samenscholings verbod. Maske banda di Lama tin hopi mas espacio pa hendenan para y toch por mantene distanciamento fisico di 1.5 pa 2 meter, mester avisa e hendenan aki pa motibo cu nan ta lubida hopi lihe.
Bo salud y di bo sernan kere ta den bo man, ban yuda flatten the curve, protega bo mes y bo famia, pa e no sigui plama.
