Juli, prome luna completo di operacion comercial di aviacion na Aeropuerto di Aruba desde lockdown Re-inicio slow den cantidad di “Revenue Generating Passengers”

ORANJESTAD – Durante Juli, e prome luna di operacion despues di e lockdown, un total di 11,176 Revenue Generating Passengers (RGPs) a biaha for di Aeropuerto Internacional Reina Beatrix (AUA Airport) pa varios mercado di cual 7042 pasahero a biaha pa Merca, 2566 pasahero pa Europa y 1548 pasahero pa Caribe Hulandes (28 pasahero a biaha cu buelo di repatriacion pa Latino America). E cifranan aki por ta mihor di loke a premira, pero, compara cu 2019 e cantidad ainda ta hopi abou, y nos tin un caminda largo ainda pa recupera e nivel di trafico cu AUA Airport tabatin prome cu e crisis di Covid-19. Na Juli 2019, AUA Airport a procesa 121,926 RGPs cu ta traduci den un recuperacion di apenas 9% den trafico durante Juli 2020.
E averahe di load factor (LF) na salida (cantidad di asiento den e cantidad total a bordo di un avion cu ta wordo ocupa ora di sali for di AUA Airport) pa e mercado Mericano tabata 40% den e periodo di 10 di Juli pa 31 di Juli, 2020. E LF pa full e luna di Juli pa e mercadonan Europeo y Caribe Hulandes tabata 56% y 55%. E averahe di LF pa Juli 2019 pa e mercadonan aki tabata 95%, 95% y 68% respectivamente.
Durante e prome siman di Augustus, AUA Airport a ricibi un averahe di 9 buelo pa dia, esaki compara cu 37 buelo diario durante e mesun temporada anja pasa. Pa Augustus 2020 AUA Airport ta premira di procesa aproximadamente 16,000 pa 19,000 pasahero cu ta sali for di Aruba. Esaki lo ta un recuperacion di aproximadamente 17% di e trafico cu a wordo procesa na Augustus 2019.
AUA Airport ainda ta cauteloso riba e speculacion pa e resto di 2020 y ta premira cu lo recupera entre 35% – 40% di e cantidad total di RGP cu a wordo procesa den full 2019.
“Nos ta contento cu nos ta operacional desde Juli, pero e caminda pa recupera e trafico aereo lo ta largo y dificil. Aerolineanan tambe ta purbando na yega e nivel di demanda cu tabata existi prome cu e pandemia, aunke e cifranan di biahe ta subiendo di forma stabil manera a wordo mira e ultimo simannan” – Joost Meijs, CEO di Aruba Airport Authority N.V.