Oranjestad: segun sra. Arends-Reyes siman pasa Aruba a habri frontera pa vuelonan internacional pa asina por prepara pa duna bon bini na nos bishitantenan. Ta mas cu claro cu Aruba a haña su mes confronta cu un situacion di un economia plat, na momento cu Aruba a bai den un lock-down pa motibo di contagionan local. E decision di stop tur vuelo di afor tawata pa motibonan di salud y seguridad pero awe te ainda ta costando nos hopi caro pa motibo di desempleo nunca antes conoci y famianan dependiente di cuanto banconan por duna plazo y ki dia economia lo por cuminsa start back poco poco.
E plazonan di banco ta casi caba y e trabounan apenas tin un siman cu a cuminsa ta purba pick- up. Aruba tin e ‘zwaard di Damocles’ di Madre Patria ainda riba nos cabes mientras cu e pandemia a hasi cu den 1 aña di tempo Aruba su economia a contrae cu 33.5%, mientras cu durante e Gran depresion Merca su economia a contrae cu 30% den 10 aña di tempo. Den e un siman aki ya a conose 12 caso positivo di Covid-19, cual con cu pone ta significante mirando cu tur caso por desaroya na un admision den hospital of por bira un caso grave pa interna den ICU. Nos capacidad di ICU ta keda limita y e expansion di e capacidad ta inclui nos salanan di operacion. Aruba mester percura pa e contagionan no pasa pa localnan y ta escritamente prohibi pa esnan den isolacion kibra esaki.
Pesey ta importante pa tin reglanan estricto pa cu esaki. Y si tin casonan cu ta sali na cla cu no ta atene nan mes ba regla mester percura pa actua. Sra Arends-Reyes a manda un serie di pregunta oficial pa Minister di Turismo, Salubridad y Deporte pa por haña mas claridad tocante e planan cu Aruba tin pa cu e topico aki. Nos ta bibando den un temporada di Pandemia y Aruba mester purba biba cu e virus aki pero sin compromete e salud di nos comunidad. E topico di mask ta algo cu sin cu e ta obligatorio hopi di nos trahadornan di e industria ta bisti’e y ta yuda na protehe nan mes y otronan. Den e preguntantan cu Sra Arends-Reyes a manda pa Minister e ta puntra entre otro cuanto acomodacion pa isolacion tin designa pa bishitantenan na Aruba?
Tambe cuanto cama den ICU tin den uzo caba na e momentonan aki, talvez pa otro enfermedad. Kiko ta e breaking point di cantidad di casonan den isolacion mirando cu e capacidad di ICU ta limita. Kiko tur e covid-19 Aruba insurance di 15 usd pa persona pa dia ta cubri y si traslado cu Air Ambulance of costonan di hospitalizacion ta inclui? Ki maneho tin pa esnan den isolacion y ki consecuencia lo tin si nan no cumpli y pone e salud di e comunidad y transmicion local como risico. Covid ta keda un virus hopi peligroso y cu no ta descrimina, tanten cu no haña un vaccine pe oficialmente y Aruba tambe dicidi cu ta busca of reserva fondo pa esaki, nos ta keda vulnerabel. Tambe mirando cu Bahamas a stop di tuma vuelonan di Estados Unidos y Sint Maarten ta considerando esaki, ki plan Aruba tin si den caso Aruba no sera frontera pero cu Merca mes duna un conseho negativo pa viaha mirando cu e casonan na Merca no ta disminui. Na Europa tin pais ta papiando di un comienso di un ‘second wave’ y ta considera nan mes zona nan codigo ‘oranje’ y ki efecto esakinan por tin pa Aruba? Parlamento te ainda ta e organo di mas halto y mester ta na altura di e planan aki mirando cu tur hende kier pa economia draai y tur hende ta keda positivo pero hecho ta cu nos ta dependiente di desaroyonan internacional tambe y no por sera wowo pa esakinan. Ta dificil pa por premira cuanto pasahero mas lo logra identifica na tempo cu tin e virus den e periodo nos dilanti pero mester tin plan A, B, C, D na momento cu nos a pasa den un temporada di pandemia y lock down cu a causa hopi pobresa y tristesa pa Aruba. Mester wak kiko como pais nos a siña y wak con nos por sigui mitiga e risiconan pa por balansa e start di nos economia y crea perspectiva pa nos pueblo pero sin compromete e salud y bienestar di nos pueblo. Nos tin cu prepara pa e realidad nobo cu nos ta confrontando nos mes cun’e.