ORANJESTAD – Recientemente, representante di Oficina di Turismo di Aruba (A.T.A.) Rayon Koolman, cu ta traha como Digital Marketing Specialist, tabata tin e placer di honra un fiel bishitante di nos isla, esta Sr. Ken Grille. Ya pa varios aña, Sr. Grille a sa di bishita y sostene nos isla, specialmente via su pagina riba Facebook conoci como ‘All Things Aruba’. Durante e pandemia di COVID-19, Grille a dicidi cu e no lo regresa su cas na New York pero lo keda Aruba. Aki el a haci tremendo uzo di su pagina ‘All Things Aruba’ cu actualmente tin mas cu 41,000 miembro, incluyendo bishitantenan cu den pasado a bishita Aruba y tambe bishitantenan potencial. Via e pagina aki, Grille a comparti informacion importante tocante desaroyonan tumando luga na Aruba. Ya pa mas cu 10 aña, Grille ta bishita nos isla y brinda su sosten incondicional, specialmente cu su presencia riba Facebook caminda tambe e ta comparti varios momento inolvidabel cu ta fotografia y e experiencianan unico cu Aruba tin pa ofrece. Di e forma aki, Grille ta comparti cu otro hendenan rond mundo e bunitesa di nos isla cu no tin pa iguala. Durante e pandemia di COVID-19, Ken Grille a traha di serca cu Rayon Koolman.
Pa mustra aprecio pa e sosten cu Grille ta brinda constantemente na nos isla, A.T.A. a honra Grille cu un certificado caminda ta reconoce como un ‘Goodwill Ambassador’ cu ta sostene como tambe yuda promove Aruba como un destino turistico. Di e forma aki, Aruba ta bisa Sr. Ken Grille ‘Masha Danki’ pa su esfuerso y apoyo continuo.