Bruheria, ta data for di siglonan y siglonan, tur parti di mundo tin bruho, mirado di futuro, lesamento di man, mirado di kopi, glas di awa, den bola di cristal etc.
Te riba e dia di awe, rond mundo tin hendenan cu ta practica y cu tambe ta kere fielmente den bruheria of algo parecido na esaki. Nos no ta huzga niun, pero si nos kier dedica e historia aki na con cierto estafadonan tabata pretende di ta bruho y tabata estafa esunnan cu fielmente tabata kere den nan.
Na Aruba tambe tin hopi storia di bruha, hopi hende cu tabata kere y otro cu no tabata kere at all. Tin hende cu segun nan berdad e bruho a yudanan y tin otro cu a sinti cu nan a wordo estafa, tin biaha te hasta pa sumanan grandi.
Den e historia di Aruba, bruha, mirado di futuro etc. tabata hopi in. Hopi hende tabata practica e trabou ilegal aki of tabata bin di exterior pa ehecut’e algun tempo riba nos isla, paso esaki tabata un forma hopi facil pa estafa e bon creyentenan.
Testimonio
Nos a combersa cu un señora cu a yega di bishita e varios di e bruhonan di antes. E la conta nos di varios bruhonan cu tabata traha, duna baño, traha amuleto di suerte y mira futuro etc. E la contanos cu na varios parti di nos isla tabata tin bruho, lesado di carta etc. cu tabata haci esaki. E señora aki ta conta algun experiencia cu e tabata tin bishitando bruhonan.
E biaha aki nos lo dedica nos mes na algun experiencia cu den pasado algun di nos hendenan na Aruba a pasa na man di estafadornan, cu tabata pretende di tabata bruho.
1957, noticia cu a wordo publica, comerciante a haya un bruha dilanti su toonbank.
Na aña 1957, un comerciante na Paradera, den oranan di mainta dilanti di e toonbank di su tienda a bin topa cu un supuesto bruheria, un caha di morto den miniatura, den e caha di morto tabata tin yen resto di bela preto.
E comerciante a spanta asina hopi, e homber tabata man na cabes, tur spanta paso mesora e la pensa cu “awo si ma pompa, mi ta bay perde mi negoshi y cos malo ta bay pasami”. Un persona cu a yega na e tienda, a trata na calma e homber, pero no a logra, e ora e la dicidi di bisa e homber bay polis. Mesora e comerciante aki a yama polis. Ora polis a yega na e tienda, enberdad nan a bin topa cu e comerciante tur desespera, pero e agentenan policial cu no tabata kere mucho den bruheria, a logra despues di basta papiamento, pa calma e comerciante y despues cu e agentenan a piki supuesto bruha y a bent’e afo, e homber a calma un poco.
1963, Un supuesto bruho a estafa un tata di famia y su dos yiunan menor di edad.
Na 1963 den luna di Juni pa Juli, un cabayero di inicial R.S.S. mester a presenta dilanti mesa berde pa motibo cu e tabata worde acusa di a estafa un famia humilde, e tata y su dos yiunan a wordo estafa pa 170 florin, cual sigur e tempo ey tabata basta placa.
R.S.S. tabata tin 50 aña y a pasa mita di su bida tras di tralie, pa estafa. E tata di famia, C.C. di 34 aña y su yiunan, un yiu homber di 15 aña A.C. y un yiu muher di 16 T.C.
Dilanti mesa berde, R.S.S. a bin ta pretende, cu su caso no tin nada di haber cu bruheria, pero tin di haber cu Rosicrusians, di cual e mes no tabata miembro mas.
E tempo ey tabata tin hopi buen creyente, cu facilmente tabata kere den cuentonan fantasma.
Estafado a kita 50 florin for di tata di famia pa haci bruheria pa supuestamente yuda e famia
Riba un bon dia, dos homber a yega na porta di cas di e famia. Tabata trata di e cabayero R.S.S. y un otro mas. Nan a cuminsa conta e tata di famia cu nan tin hopi dificultad pa haya trabou y cu nan no tin caminda di biba. E tata di bon curason a ofrece e dos hombernan aki un lugar den su cas pa nan keda. R.S.S. y su amigo S. a dicidi di keda, pero no a dura mucho, cu nan a cuminsa cu nan cosnan, e cabayero S. a bay bisa e famia C.cu R.S.S. a mira spirito malo den nan cura di cas. E la splica e tata di famia cu ta paso nan no tin cacho y pa e motibo aki spirito malo ta yega cerca di nan cas. Pero mesora su tras R.S.S. a ofrece e famia un ayudo, bisandonan: ” pero si bo dunami 50 florin mi ta busca algun cos na botica, pa asina core cu e spiritonan malo y pa nan no molestia boso”. Enberdad e tata a kere e cuenta aki y a duna R.S.S. 50 florin.
Enberdad e homber a bin cu algun cos for di botica y a prepara un awa, den e awa tabata tin entre otro kaneel. R.S.S. a baña e famia completo cu e awa supuestamente bon prepara. E la bisanan alabes cu nan mester bay haci un trabou, cu lamoenchi.
E trabou aki lo tabata pa supuestamente core cu e spiritonan malo for di nan cura di cas. E la traha un buraco y a pone e famia dera tres lamoenchi den e buraco den nan cura y a bisa e famia cu e lamoenchinan aki nunca lo daña. Esey no tabata tur, e la bisa e famia, cu esaki ta e graf di e lamoenchinan, e la duna nan un oracion y a bisanan pa nan hinca rudia dilanti di e supuesto graf di lamoenchi y resa e oracion. R.S.S. a bay na e fogon y a kima poco sencia. E tata di famia mester a wanta un spiel y bula over di e fogon cu e spiel den su man y mirando su cara den e spiel.
100 florin pa por gana prome premio di catochi
E 50 florin no tabata suficiente pa R.S.S., e la ripara con facil e famia tabata cay den su estafa y a dicidi di bay purba su suerte un poco mas. Algun dia despues e la bisa e tata di famia, cu mi ta bay yudabo gana e prome premio di catochi di e sorteo di Caracas. Bo mester dunami 100 florin cu pa e tempo ey tabata hopi placa. E homber a hinca esaki den un bleki y a hinke den un maleta. R.S.S. a bisa C.C. pa nunca mas mishi cu e bleki aki, paso esey lo nifica su morto.
20 florin pa dos cadena pa protecion contra spirito malo
Riba un bon dia R.S.S. a dicidi di bay tuma e dos yiunan di C.C. haci tambe, e la bisanan cu Si nan dun’e 20 florin, e lo bay busca dos cadena como proteccion cu nunca niun spirito malo lo acercanan y nada malo lo pasa nan, cual nan a haci tambe. Ainda e famia no tabata mira cu ta pantomina e homber R.S.S. tabata haciendo. Tambe e la mira futuro pa e muchanan door di sacudi un lenso, hink’e bou di nan braza.
Dilanti mesa berde
E yiunan a cuminsa duda den R.S.S. nan no a confia e cuenta ora nan no a haya nan cadena di supuestamente proteccion y su predicionnan no tabata cuadra, nan a bisa nan tata y asina a dicidi di batie alarma, despues cu nan a perde caba 170 florin, R.S.S. a keda deteni pa autoridad y mester a presenta dilanti mesa berde.
Segun e Fiscal di e tempo ey, en realidad e no ta haya cu R.S.S. a estafa nan paso esun cu laga un hende gañe wowo habri, ta e mes a busca, tambe e la bisa e tata di famia cu bo yiu homber di 15 aña mes, no a kere tur e cuento aki, pero despues di e papia fuerte cu e tata, toch fiscal a pidi 6 luna pa e homber R.S.S. castigo di prison. Pa motibo cu e la kita inhustamente 170 florin for di e famia.
Un bruha Chileno lo a estafa varios hende, e la estafa un comerciante 500 florin.
Na aña 1973, un dama di nacionalidad Chileno a yega Aruba, e dama aki a aparentemente e la bay biba den area di Noord. E la bin Aruba cu un meta pa estafa algun persona cu fielmente tabata kere den bruheria, den lesamento di carta, futuro etc.. manera nan tabata yama esakinan. Riba un diabierna un comerciante Arubiano a haya bishita di e dama Chileno aki, e dama a acerk’e y a bis’e cu e por lesa su futuro door di mira den su planti man.
E muhe a bisa e comerciante cu bo tin hopi hende cu debebo y nan no ta pagando bo. Aki ta unda e dama a dal’e riba e cabes di clabo. E comerciante a admiti, mesora su tras e dama a bisa e comerciante cu e tin un bon cos pa yud’e cu ne, pa e hendenan aki paganan debe y tambe pa e por biba felis den futuro. E muher a pidi e comerciante 500 florin pa asina e bay consulta cu e spiritonan bon y Dialuna e lo bin bek cerca e comerciante pa haci e supuesto trabou pa asina e comerciante por ta felis pa resto di su bida.
E comerciante cu a keda bou impression di locual e dama Chileno a bise, a saca 500 florin y a duna e muher. E muhe prome cu e la sali for di e tienda a bisa e comerciante cu Dialuna e lo tey bek. E comerciante a laga diasabra pasa, pero e cuminsa haya manera duda den locual e muher a bis’e. E comerciante no a confia e cuenta y no por a warda te dialuna pa dama bin bek cu e supuesto trabou cu e spiritonan bon lo dun’e.
Diadomingo mainta e comercianto no tabata por mas y a bay enbusca di di e muhe y su spiritonan bon. Niun caminda e no por a topa cu e dama Chileno, mas duda e la haya, no a keda e comerciante nada otro di bay recherche. Recherche a bay busca paradero di e dama Chileno y a bin resulta cu e dama Chileno a bandona Aruba e dia anterior esta diasabra e la biaha pa Baranquilla. No a keda e comerciante nada otro di bay cas, sin a wordo yuda door di spiritonan bon of malo y 500 florin mas pober. Pero si e la siña un bon les, cu nunca mas e lo kere den webo di gai y ni lo laga niun hende gañ’e of estaf’e.
Dama desespera a duna un homber desconoci mil florin pa un hechizo
Dia 2 di juli 1981, na un cas na Piedra Plat a yega dos homber. E dos hombernan aki tabata papia spaño y nan a puntra e señora di cas si e tin yiu. Na momento cu e la bisa nan cu e tin yiu, un baby di 6 luna, un di e hombernan a saca un armband di kraalchi y a bisti e baby. E homber a hunta e lomba di e baby cu un azeta.
Mal señal
Despues e la pidi e muhe pa e mira den su planta di man. E la saca un botter chikito for di su saco y a basha e likido for di e botter den man di e muhe, e likido tabata hole hopi fuerte.
Despues e homber a bisa e muhe pa e coy un glas p’e. E homber a tira algo parecido na tera y katoena den e glas, e la bisa e muhe pa e scupi den e glas. E homber a tapa e glas cu un paña blauw y e señora mester a wanta esaki den su man. Na dado momento e la sinti e paña bira cayente, te cu e paña a cuminsa kima. E homber mesora a bisa e dama cu esaki ta un mal señal y cu pronto e dama of su baby lo muri.
Ayo homber y ayo mil florin
E dama a spanta asina hopi y cuminsa yora. E homber a calm’e y a bis’e cu e so por yud’e scapa nan bida, pero cu esaki lo costanan basta placa, E homber a bis’e si bo dunami 3 mil florin mi lo traha un trabou pa kita e cos aki for di boso caminda. E señora den su desesperacion a bise ta bon, pero cu na e momento ey, e no tabata tin 3 mil florin, e tin solamente mil florin so, mesora e homber a bay di acuerdo pa ricibi e mil florin y e la baha na awa cu mil florin den su saco. Despues di basta rato e muhe a bay sinta, analisa y a bin bij bek na su sano huicio. E la dal man na cabes y a bin compronde cu e homber nan aki a caba di dal’e abou, e homber a bay cu su mil florin cu e tabata tin gespaar. Nunca mas ni placa, ni trabou, ni morto, ni estafador. Un Estafa completo.
Algun bruho estafador mester a presenta dilanti mesa berde
Ta hopi estafador bruho tabata tin na Aruba. Asina nos ta mira cu ta for di decadanan pasa caba, nan tabata sa cu e Arubiano ta bon creyente y ta probecha di nan noblesa. Pero den algun caso autoridad a baha pisa riba nan, a detene nan y algun mester a te hasta presenta dilanti mesa berde y a haya castigo.
Usando medionan di comunicacion, programanan na radio station, cu diferente testimonio
Awendia nan tey ainda, tin hopi hendenan cu ta bin for di exterior y ta uza medionan di comunicacion especialmente radiostationnan pa propaganda cu nan ta e miho bruho, cu lo yudabo pa bo haya suerte, pa bo haya cas, pa haya trabou, pa haya pareha of pa bo ta exitoso etc. Especialmente ora bo situacion financiero ta malo, segunnan nan por yudabo haya hopi placa.
Durante cu nos tabata haciendo nos investigacionnan nos a combersa cu un persona cu no mucho tempo atras e a bay bishita un Babalawo Cubano, e Babalawo a cobr’e 50 florin pa un consulta, esey tabata pa e persona bishit’e y bis’e su necesidad. E Babalawo a bis’e cu e lo bay yud’e cu un trabou (manera nan ta yame) pa e haya suerte, cas, trabou etc. pero e ironia tabata cu e Babalawo a cobre 1750 florin pa esaki. E persona aki e momento ey no tabata tin trabou, niun entrada, pero door di a scucha e programa na radio cu yen di testimonionan cu tabata mustra real, palabranan bunita y hopi propaganda. E la dicidi cu e tambe kier wordo yuda di e forma aki .
E persona kemen “ma bay pa e yudami, paso mi no tabata tin trabou, ni lugar di biba etc. mi tabata un persona cu mester ayudo, e Babalawo ey si e tabata asina bon, nunca e lo a cobrami un montante asina halto, cu e mester sa cu mi no tin’e y no tin caminda di hay’e”. E homber a hari y a bisa nos di unda e Babaleawo ey lo tabata kier mi saca e 1750 florin, tover, magia si mi por a tover placa lo mi no a bay cerca dje.” E homber bou harimento a conta nos, “E Babalawo ey kier a haci un trabou pa e bira 1750 florin mas rico y caba di haci mi situacion mas pio”.
Den algun caso den desesperacion, hendenan cu ta kere asina fiel ta bay hinca nan curpa den mas problema den debe, riesgando tur cos pa paga e montante aki, sin sa si nan lo wordo yuda of wordo estafa.
E articulo aki ta un parti chikito di algun caso di bruhonan estafador, ta keda na cada ken pa kere den locual nan kier y haci locual nan kier cu nan entrada. E historia di Aruba aki ta djis ilustra con den pasado hendenan tabata perde placa, sin haci mas investigacion, pa simpelmente bay tras di palabranan bunita di un estafador. Comerciantenan y varios hendenan humilde a perde hopi placa, door di cay den trampa di estafadornan, cu no tin niun clase di don pa yuda hende, pero SI tabata tin un don cu ta con pa horta hendenan humilde y buen creyente.