Aruba ta practicando un di e formanan di mas safe pa permiti bishitantenan drenta nos pais!
Den e conferencia di Prensa di diaranson anochi pa duna informacion di e desaroyo y maneho di Gobierno pa recuperacion di Covid-19, Prome Minister Evelyn Wever-Croes a enfatisa cu lo habri frontera pa reactiva Aruba su economia cu menos riesgo posibel.
Dia 1 di juli a cuminsa un etapa nobo den recuperacion di nos economia ora cu a habri fronteranan pa destinacionnan di Europa, Canada y Caribe cu excepcion di Haiti y Republica Dominicano. Ya caba Aruba a cuminsa ricibi algun buelo extra awo cu oficialmente fronteranan a habri y ta spera cu esaki lo aumenta.
Aeropuerto di Aruba ta bon y cla prepara pa apertura: testnan ta wordo haci 100% y tur regla di higiene y distanciamento social ta keda vigente y ta wordo oberva estrictamente. Cu apertura di frontera pa e destinacionnan aki, Gobierno di Aruba ta spera cu esaki lo cuminsa trece e desaroyo economico bek den nos pais.
Tambe ta obvervando e reapertura cu nos fronteranan cu Merca. Esaki, Prome Minister a remarca, no ta bayendo na e manera cu anteriormente a wordo pensa mirando e desaroyonan cu ta tumando luga na Merca. Ta monitoriando e desaroyonan cu ta tumando luga na e diferente estadonan Mericano pa asina evalua y tuma e miho decision.
Prome Minister a enfatisa cu no lo tuma ningun riesgo na momento cu habri frontera cu Merca y ta evaluando e diferente opcionnan. Un opcion ta pa no permiti entrada di e zonanan cu ta wordo considera e ‘hot zones’, por ehempel Florida. Otro opcion ta pa introduci extra exigencia di testmento pa e zonanan aki.
Na Aruba nos tin hopi reglanan y garantianan cu ta duna nos mas trankilidad. Aruba ta practicando un di e formanan di mas safe pa permiti bishitantenan drenta nos pais. Esakinan hunto cu consehonan di expertonan, lo yuda, pa prome cu dia 10 di juli cu ta e fecha stipula pa habri frontera cu Merca, tuma e miho decisionnan pa yega na un miho balance di recuperacion economico cu menos riesgo posibel.