Parlamentario Alan Howell ta mira cu wowo positivo e decision di gobierno pa muda e parti di bijstand di Departamento di Asuntonan Social pa San Nicolas.
E parlamentario cu ta residencia pariba di brug ta expresa cu no ta un secreto cu pariba di brug ta biba e hendenan cu mas necesidad pa cu ayudo y sosten social y cu esaki ta keda demostra door di varios studio cu ta data inclusive prome cu e crisis di COVID-19.
Ta pa tal motibo cu semper el a keda para duro cu San Nicolas merece mas atencion cu ta posibel pa loke ta trata e aspecto social, muy especial esnan cu tin mester di onderstand of bijstand y awo den e temponan dificil aki mas cu nunca.
Pesey e ta aplaudi y ta haya e decision di Minister di Asuntonan Social pa muda dentro di poco tempo henter e afdeling di bijstand di Departamento di Asuntonan Social pa San Nicolas un paso positivo. Nan lo ta ubica unda e policlinica bieu tabata.
“Cu e bon noticia aki mi ta keda optimista cu nos hendenan di pariba lo haya nan atencion mereci cerca di cas tambe. Semper nos hendenan a bay pabou, dus a yega ora pa pone nos hendenan di pariba tambe central. Un danki na Minister Glenbert Croes y Sra Glenda Hernandez Directora di Departamento di Asuntonan Social.