ORANJESTAD – FPNA a tuma nota di un publicacion recientemente, unda a duna informacion di piscamento den Parke Nacional Arikok, y ta desea pa elabora correctamente riba esaki.
Na momento di e traspaso di maneho di e Parke Marino Aruba pa FPNA, a delinea un plan di maneho cual lo facilita e proceso transitorio y implementacion di regulacion pa cu e uso y recreacion den e areanan marino protegi. E plan di maneho a indica cu lo tin un proceso largo unda lo hiba un dialogo cu tur usuario pa hunto yega na un plan di maneho definitivo incluyendo regulation pa cu e uso di e Parke Marino Aruba.
Entretanto a cuminsa cu e trayecto importante di dialogo hunto cu tur usuario, incluyendo e piscadornan. E proceso aki a wordo interumpi door di e situacion di Covid-19, pero ta den planning actualmente pa inicia den luna di september proximo, siempre y cuando lo mantene e seguridad di tur presente siguendo e condicion nan di distanciamento social.
Ademas FPNA a hiba un conversacion cu e union di pesca lidera pa sr. Arthur Giel, unda a elabora ariba varios topico y sigur a enfatisa cu hunto nos lo yega na un acuerdo mutuo durante e sessionnan programa pa september proximo en adelante. Tambe a elabora ariba e situacion actual unda piscadonan cu jaarpas por drenta Parke Nacional Arikok entre 8:00AM y 5:00PM pa bay pisca na baranca. Ademas, a yega na acuerdo cu lo bai desaroya un sistema di permiso pa piscador cu ta hasi uso di baranca den Parke Nacional Arikok pa pesca y asina nos tin nan registra den un registro oficial di FPNA a base di criterianan cu lo defini den colaboracion.
Nos ta spera di por desaroya e sistema aki a corto plaso asina brindando nos cuidadanonan e oportunidad pa eherce e tradicion artisanal aki na un manera sostenibel.
Pa mas informacion por tuma contacto libremente cu [email protected]