Cu profundo tristesa partido MEP a tuma nota di fayecimento di e gran compositor, musico y cantautor Arubano awe den feliz memoria Vicente Kelly. Sin duda cu Vicente Kelly ta un musico unico cu a marca su nomber den historia musical na Aruba caminda cu su persona – pa medio di su composicionnan creativo y yen di humor – pa decadanan largo a presenta tur loke ta biba bao di e pueblo Arubano.
Cu e fayecimento di Vicente Kelly Aruba a perde un gran yiu di tera cu a hiba nomber di Aruba te den exterior y causando furor cu su canticanan original.
Na bida Vicente Kelly tabata e bode/chauffeur di nos Libertador Betico Croes pa ken Vicente tabatin un aprecio, fieldad y respet hopi grandi.
Pa recorda e gran Arubiano aki na bida, dia 18 di maart 2012 partido MEP a organisa su actividad di Dia di Himno y Bandera na Cede Libertador Betico Croes na Santa Cruz y na e ocasion aki a brinda un homenahe y reconocemento special na e gran cantautor di pueblo Vicente Kelly. E dia ey dilanti di e publico presente Vicente Kelly a canta algun di su canticanan popular y na final Lider di MEP, Evelyn Wever Croes a gradici Vicente Kelly den presencia di su famia pa tur loke el a haci pa enrikece e cultura y musica Arubano.
Un biaha mas partido MEP ta gradici Vicente Kelly pa tur su trabaonan riba tereno musical y ta desea su señora, su yiunan y demas famia hopi forsa den e dianan aki.
Cu Vicente sosega dushi den brasa di nos Señor.
