Cabayero cu a hit&run na Moko haya na altura di Tierra del Sol

Tierra del Sol/Moko – Diadomingo atardi den careda di 5’or polis a bay Moko pa un auto cu a hit&run un cura di cas. Lo tawata trata di un pick up.

Algun rato despues informacion a drenta di un caso unda cu un pick up Nissan a hera dal un auto y despues a bay termina contra algo di concrete na entrada di Tierra del Sol.

Un security a bay atende cu ne, pero e homber tawata bastante fastioso. Un patruya di Noord a yega y mesora a bay atende cu e chauffeur.

A resulta cu e Nissan aki lo tawata esun cu a hit&run na Moko. Segun e chauffeur e no a bebe, pero esaki ta obviamente  lo contrario.

Despues di un rato polis di trafico a yega y a bay over na detene pa buracheria. A pidi Transportwagen pa hiba e cabayero warda di Shaba.

Takelwagen a wordo pidi pa bay cu e pick up warda.