Pa fraccion di AVP un biaha mas, lamentablemente, tin cu trece asuntonan dilanti cu ta birando preocupacion grandi pa henter comunidad, segun miembro di fraccion, Arthur Dowers a declara.
“For di oranan tempran diahuebs mainta, lmi a ricibi diferente yamada di hendenan sumamente preocupa, despues cu a bin sali na cla cu AZV den un afan pa reduci gastonan operacional riba exigencia di gabinete Wever Croes, lo a dicidi di termina cu uso di e servicio di transporte pa pashentnan di dialyse.
E preocupacion ta grandi sin duda cerca hendenan cu pa algun tempo caba ta depende di e servicio di transporte aki pa ricibi tratamento medico, sea cu ta pa trata heridanan of pa haci dialyse, caminda di un dia pa otro, ta dicidi di stop di brinda e servicio aki.
E pais ta pasando den un crisis, gobierno a impone diferente medida cu a afecta pueblo pero den tur e problemanan aki, ta e propio gobierno ta dunando nos hendenan e impresion, cu nunca e hende tabata central pa gabinete Wever Croes.
Den inico di e periodo di gobernacion aki, Prome Minister y cantidad di otro hendenan di e gobierno aki a insisti cu nan tin e ser humano central, cu e hende ta bin na prome luga.
Sinembargo practicamente na mes momento cu gobierno ta dicidi di corta den e servicio di cuido medico di un grupo cu pa gran parti ta hendenan grandi, tin un Minister ta bin dilanti y anuncia un proyecto cu e lo bay ehecuta.
Minister di Turismo Dangi Oduber ta bin anuncia construccion di un pier na San Nicolas, algo cu na otro momento, bou otro circunstancianan lo por pero den e dianan dificil aki, ta un decision sin pia no cabes.
Loke a e locura di mas grandi, ta cu net e Minister di Salud Publico, cu tambe ta responsabel pa maneho di AZV y e proceso di cortamento di gasto operacional, ta esun cu ta bin anuncia un proyecto cu na e momentonan aki no por tin mas urgencia cu bienestar di salud di hende.
Con un gobierno cu semper a papia di ta pone e ser humano prome, ta dicidi di hinca placa den un proyecto di un pier anto practicamente na mes momento, ta avisa tur pashent cu pa hopi tempo ta haciendo uso y ta depende di e servicio di transportacion pa nan ricibi cuido medico, cu for di dialuna padilanti nan mes tin cu bay pa tratamento medico.
Practicamente loke Minister di Salud ta bisando pueblo di Aruba, ta cu contruccion di e pier ta bin prome cu nan bienestar, nan salud y esey ta realmente tristo.
Hero, palo yu schroef ta mucho mas importante cu salud di nos hendenan y cu pa esey gobierno tin placa pero no pa yuda hendenan cu tin cu bay hospital pa tratamento y den algun caso, cu ta alarga nan bida.
Awor e Minister por bisa cu e proyecto aki ta riba presupuesto, e por bisa cu Parlamento a aproba placa pa e pier pero e Minister sa masha bon cu e por bin Parlamento y pidi y haya permiso pa e por usa e placa aki pa sigura salud di nos hendenan pa un tempo.
Den momentonan di crisis un gobierno serio cu mandatarionan serio y capas cu ta bon na altura cu e ser humano realmente mester ta semper central, e tin cu haya un solucion pa nos hendenan sigui haya tur asistencia necesario pa sigura nan salud, sigura nan bida.
E excuus cu tin placa aproba riba presupuesto no ta bay ya cu gabinete Wever Croes tin un presupuesto aproba di 1.3 biyon florin cu gobierno Hulandes ya a anuncia cu e tin cu wordo cambia pa asina Aruba por haya ayudo financiero, pues caminda pa cana tin.
Nada mester of por ta riba bida di un ser humano y e reaccion cu nos a bin ta ricibiendo di hopi hende den comunidad, ta otro muestra cu gabinete Wever Croes no tin nocion di kico nan tin cu haci y con nan tin cu lucha pa bienestar di nos hendenan,” Parlamentario Arthur Dowers a declara.