Na momento cu e pandemia di COVID-19 a presenta na Aruba, gobierno a tuma e decision pa cera nos fronteranan pa evita transmision di e virus. Un medida doloroso, pero necesario pa salbaguardia salud di nos pueblo.
Na mes momento un rapport di S&P a mustra kico e impacto di un lockdown lo nifica pa turismo ya cu Aruba su ingreso ta depende rond di 80% di turismo. E señalamento di S&P no ta nada nobo. UPP a yega di mustra varios biaha e dependencia aki unda a adverti cu expansion di un economia mono-cultural lo hiba nos na riesgonan grandi, entre otro pa nos capacidad di carga (teritorio, infrastructura, cuido, medio-ambiente, finansas, etc).
Awor nos por a tuma nota cu memey di e pandemia di Covid-19, Minister di Infrastructura “doodleuk” ta anuncia un maneho nobo di gobierno pa loke ta trata expansion di 2000 camber di hotel pa e siguiente 5 añanan. E expansion ta basa riba calculacion di un comision di gobierno, pero e informacion no ta divulga si ta trata di cambernan cu ya a wordo comprometi prome COVID-19. Tampoco ta cla si e cantidad di camber ta mara na e areanan cu ya ta basta satura caba of si esaki ta pa henter Aruba, pues incluso P’ariba di Brug.
Di un banda ta di aprecia cu ta trata di reduci e cantidad di cambernan, pero con por pensa di expande si ta premira menos ingreso di turista probablemente den e siguiente 2 aña.
Pero di un otro banda dicon no a recuri e caminda pa para TUR posibel compromisonan cu e gobierno anterior lo a haci. UPP ta convenci cu a largo e lo sali hopi mas bentahoso pa Aruba si a “call off” tur e compromisonan, sigur mirando cu alabes e circumstancianan ta completamente otro, pa por hustifica pa “call” nan TUR “off”!
Parce cu ta ignora e hecho cu COVID-19 a mustra hustamente con vulnerabel nos economia basa riba un pilar so ta. En bes di trata na minimalisa nos dependencia di entrada for di turismo, parce cu hustamente ta trata na haci e dependencia aki mas grandi. UPP ta di opinion cu hustamente awor gobierno tin tur clase di motibo pa para TUR construccion di cambernan di hotel. E pandemia a trece un cambio importante den pensamento y expectativa encuanto desaroyo di Turismo. Tur parti mundo gobiernonan ta imponiendo paro na mas expansion (capping), pasobra no ta premira cu den e proximo 1 aña y mei pa 2 aña lo no tin un vacuna obtenibel.
E expansion di camber lo nifica pa Aruba 1.8 trahador extra, gran parti ganando apenas un minimumloon, lo ta necesario pa cada camber. Por lo menos 2500 hende mester bin acerca y treciendo nan famia, esaki kiermen un extra 10.000 hende, cu mester biba di un sueldo minimo. Tambe nan lo mester lugar di biba, scol pa e yiunan por haya educacion, cuido medico y social (AZV), careteranan etc. Pues un presion enorme riba e mesun medio ambiente cu gobierno ta pretende di ta rescata. Hopi di e trahadornan aki lo no ta paga belasting tampoco, mirando cu nan lo gana sueldonan abou.
Nos por scucha e minister papia di raportnan, pero nos tur sa cu Aruba ta SOBRE-CARGA Y POBLA caba. UPP ta kere cu NO ta huicioso pa awor pone 2000 camber extra. E ley cu lo ta den preparacion mester mas bien ta uno cu ta stipula un moratorio y na unda cu pa cambia esaki, lo mester tin un aprobacion di 2/3 parti di Parlamento. UPP tin e impresion cu e “normal nobo” cu gobierno ta anuncia constantemente no ta conta pa su mes, pasobra e actonan ta mustra cu e “normal biew” ta keda domina nan alternativanan. Nos ta urgi gobierno pa recapacita. Tambe ta interesante pa haya sa opinion di Parlamento, mirando cu na varios ocasion a pasa mocion pa bin cu un moratorio. Para TUR e compromisonan pa nos logra un NORMAL MIHÓ!!
Pa UPP Aruba ta YEN=YEN!