Watty Vos Boulevard/Ponton – Diahuebs merdia den careda di 12:15 informacion a drenta na Centro di Alarma cu un auto lo a bolter ariba Watty Vos Boulevard.
Polis tambe a wordo informa y mesora dos patruya a sali pa e sitio.
Na yegada di polis Brandweer ya tawata na e sitio, y e chauffeur di e auto tawata pafo caba.
Tres palo di luz mas prome por mira cu e Nissan Skyline a perde control y kita bay na su man robes. Aki e la dal contra e acera perdiendo control completo ariba e auto.
Tres palo di luz mas leu e la bay termina ariba su dak, perdiendo ambos wiel dilanti. Velocidad halto ta mustra di a hunga un rol den e accidente aki.
Ambulance tambe a presenta y mesora Paramediconan a baha y a bay papia cu e chauffeur. Despues cu e la cana subi den e ambulance Paramediconan a opta pa hiba e chauffeur Hospital, debi cu e lo tawata tin dolor den pecho.
Caminda y trafico a stagna pa basta rato, debi cu mester a haci e caminda limpi y tambe takelwagen mester a lanta e vehiculo.
