Boegoeroei: Dialuna algo despues di 6’or di atardi, presencia di polis a wordo pid cu urgencia pa un problema entre tata cu un yiu cu a bay completamente for di man na momento cu e tata a pasa man pa un cuchiu y kier a hinca su propio yiu.
Na yegada enberdad polis ta topa e yiu homber pafo di e cas, e yiu homber tabata rabia y tabata tira palabra pa e tata. Polis a acerca e yiu y a puntr’e kiko a pasa. E yiu kende tabata hopi furioso a conta polis cu su tata a saca cuchiu p’e y kier a hink’e.
Mesora polis a bay den e cas y a bay papia cu e tata pa tende su version. E tata a conta polis cu e la bay check pa un botter di azeta y e no por a haya esaki, mesora e la sospecha cu e yiu lo a pasa man pa e botter di azeta y asina a surgi un discussion caminda enberdad e tata a pasa man pa un cuchiu y kier a hinka su yiu homber.
Na momento cu polis tabata papiando cu e tata, e yiu homber a cuminsa bira agresivo y a cuminsa bringa cu polis pafo di e cas. Mesora e polisnan na e sitio a bay atende cu e yiu homber, nan a mande vloer y despues cu polis a bisti’e boei nan a pidi pa presencia di transportwagen.
E yiu homber a keda deteni y transporta pa warda di polis. Polis despues di a tuma tur datos di loke a caba di sosode a bandona e sitio.
