E ta un berguensa total ora bo lesa un articulo di un parlamentario y den e caso aki sr Michael Lampe di fraccion di AVP cu ta duna muestra di no ta compronde mes kico ta ensera su trabou, ora cu como un parlamentario no sa mes kico constitucion ta bisa di cambionan entre otro di salario di parlamentarionan pero mas tristo ta cu su persona ta sinta di 2017 y ainda no sa e diferencia entre un mocion y un amienda.
Proceso encamina internamente
Na momento cu Gobierno a anuncia nan propocicion di rebaho di salario, den parlamento a bay un CHA (commissie houshoudelijke aangelegenheden) unda cu lidernan di fraccionnan a reuni y a bay di acuerdo di rebaho conforme di gobierno. Pero esaki ta un conseho cu mester bai un CC unda cu parlamentarionan mester bay di acuerdo. Den esaki sr Dowers a declara cu e ta bay di acuerdo pero “onder voorbehoud” dus si esaki ta mas of menos lo bay cu esaki tambe. Y nos tabata sa caba e caminda cu un politico a experimenta manera Dowers ta bay. El a wak cu colega di coalicion sr Allan Howell a vocifera cu e ta kere cu por bay 25% y esaki lo por crea disturbio den coalicion pero el a dal su dede hopi duro mes. Pero si sr Michael Lampe ta bin trabou e por tabata na altura di e prome proceso.
Parlamentario Michael Lampe no sa diferencia entre un mocion y un amienda
Den su articulo sr Michael Lampe ta papia di aprobacion di un mocion di sr Dowers pero bo ta wak cu e parlamentario no sa mes cu nos tabata tratando ley di presupuesto di parlamento y cu tur cambio di parti di un parlamentario ta bay via un amienda cu ta un cambio di ley y no un mocion cu ta un deseo. Y sigur pa su persona cu ta mas cu claro cu no ta compronde nada no ta altura cu den e tratamento aki di e ley un amienda a bin dilanti pero no di sr Dowers pero di parlamento den su totalidad pa motibo cu sr Dowers no tabata carga aprobacion pa su amienda den su propio partido incluyendo sr Lampe. Pues den e ley di presupuesto a aproba e rebaho di 25% pero como un amienda di parlamento di tur fraccion y como cu Dowers so a inscribi su mes pa papia e dia ey (debi cu a yega den CC na palabracion caba concreto pa rebaho) pa hunga cheapshow y cu na final e mester a entrega e amienda den nomber di parlamento di Aruba pa motibo di no tabatin sosten di su fraccion di AVP.
Cambio di salario di parlamentario ta bai via ley
Fraccion di MEP y RED a entrega un iniciativa di ley pa por rebaha salario di parlamentarionan. Pero mi tin duele di wak un parlamentario ta papia cu a haci wega y cu a tarda pa hasi e cambio como wega politico, pero sr Lampe no sa mes cu un iniciativa di ley tin di bay Conseho di Consulta y cu esaki tin su procedura y tambe tempo. Y ta pesey mester a warda riba e consehonan cu a yega siman pasa y mesora fraccion di MEP y RED a constesta e preocupacionan di e Conseho di Consulta y tambe hunto cu e otro fraccionan a trece e cambionan di rebaho aproba den e amienda di Parlamento di Aruba. Y siman pasa na momento cu a trata e ley di inictiativa MEP y RED pa rebaho di salario a bai como hamerstuk paso e tin aprobacion di tur 21 parlamentario aki.
Pa termina mi ta lamenta cu un parlamentario manera sr Michael Lampe cu ta sinta di 2017 den parlamento te dia di awe no sa procedura di un ley, no conoce nos constitucion y sigur ta un berguensa cu su persona no sa ni diferencia den un mocion y amienda. Un conseho na sr Michael Lampe educa bo mes prome cu bo pasa mas berguensa.